Krüüzfohrten

Krüüzfohrten hett dat jo av dat 11. Johrhunnert al geven. Dat hebbt in düsse Tiet de Krüüzridders doon. Avers de meen ik nu nich.

Hüüttodaags sünd de Krüüzfohrers mehrstendeels veel verdreeglicher un wüllen sik ´n poor schööne Daag op´n Schipp maken.

Dat Schipp föhrt dör de Gegend, de Krüüzfohrers kiekt op´t Water un tövt op ene vun de söß or söven Mahltieden den Dag. Bewegen köönt se sik avers ok. Dorför givt dat egens grote Folterboden, wo du di de Kalorien wedder wegbrennen kannst.

Dat givt för elkeen, de sülk en Schippstuur maken will, dat richtige Schipp. Avers oppassen mööt ji sachts. Sünst kann dat ween, dat de Jöögd (Jugend) sik unverwohrens in en Seniorenprogramm wedderfinnt or de Senioren op en Partyschipp sünd, wo se vun de Animateurs dör de Gegend schucht ward.

Eckhard Lakowski