Musst di nix inbilden

Musst di nix inbilden, dat du wat büst,

bist bloot een Minsk, wi jedereen is.

Beneid di ok mennigmaal een üm dien Stell,

hest du se nich mehr, vergett he di snell.

Hest di wat inbild, denn steihst du alleen,

büst gaar nix mehr denn, dat worst du bold sehn.

Musst di nix inbilden, wenn du wat hest,

hest du  dör`t Arbeit – good, boo di een Nest.

geev gern maal wat of an de, de sünd arm,

aver, ganz still un ohn ganz veel Larm.

Kannst höchstens denken in Stillen daarbi:

„Hüt help ik di un mörgen du mi.“

Musst di nix inbilden, wenn du wat versteihst,

kiek jeden Minsk an, wenn buten du geihst.

Jeder versteiht wat, genau so as du.

Meister is de, de sück meistert in Ruh.

Is di dien Dagwark gelungen, west froh,

bild di nix in, aver frei di daarto.

Musst di nix inbilden un prahl mit dien Frünnen.

Frünnen sünd so selten, so selten to finnen.

Wenn du wat büst, wat hest, stellst wat vör;

all sünd dien Frünnen, se hangt an dien Dör.

Büst aver arm du, denn kann di keen finn`,

wenn aver denn een Fründ kummt....

.......denn bild di wat in.

August Jochimsen.