|
Is all wedder sowied
End van`t November jedet Jahr
fangt Advent an, dat is klaar.
Denn fangt an dat grode Rönnen,
dröfst ok ja nix wat verpennen.
De Werbung luckt di`d Geld ut`d Knipp,
du wullt ok woll un ok woll nich.
Leztendlik lettst di övertügen,
de Kinner schölt ehr Recht ok kriegen.
Daarmit du nix vergeten deist,
schriffst allen`s up, ok dien olle Tattergreis
is so gierig up Geschenke.
He kriegt een Salv för de Gelenke.
De Fritzi kriegt een Adventskalenner,
un de Willi, de grode Penner,
de maakt di immer veel Verdruss
kriggt een Tüt mit Speklatius.
Bloot de Anni nich vergeten,
se kriegt een Sack vull Pepernöten.
Un daarto feine Schokolaa,
nix daarbi weer veel to schaa.
Un wenn du noch`n paar Euros hest
köffst du een Boom för`d Wiehnachtsfest.
Un ok een Kranz för de Advent
mit een paar Kersen, de ok brennt.
Ok de Moppen dröft nich fehlen,
kannst so fein up all verdelen.
Reicht dien Geld? Oh jeminee,
de düre Tied mit Slickeree.
Denn gifft ja noch de Dominos,
rin in de Tasch, smeckt so famos.
Un wat is dien egen Wunsch?
Twee Buddels för de warme Punsch.
Bold vergeten, för dien Ollen,
ja de kriggt een groden Stollen.
Un paar Knoken för dien Hund,
dat is för hüm ok maal gesund.
Wat fehlt nu noch, ach ja de Printen
un ok noch Wurst un denn de Schinken.
Man günnt sück wat ok wenn in`d Not is,
wat hest d` van`t Leven wenn d` erst dood büst.
Un morgen kummt de Nikolaus,
di fehlt noch wat för dienen Klaus?
Dien Görner is doch so een Netten,
he kriggt een Packung Zigaretten.
Is all tohoop, reicht ok dien Geld?
Man leevt bloot eenmal up de Welt!
Is ok dien Konto övertrucken,
betahl dat man ohn völ to mucken.
Du schuffst dien Wagen dör de Kass,
dürt dat lang, du wordst ganz blass.
Denn büst du dran, kannst nich begriepen,
de Kassenfroo will hundert Piepen.
Un büst denn buten, so een Schiet!
Wi kriggst du dat denn allens mit?
Dat Auto is doch veel`st to knipsig,
dien Bloot wallt so un warst ok hibblig.
Mit Gewalt un ok mit Sinn
hest allens rinbrocht, au din Kinn!
Stötst di daar un deist di sehr,
so`n Schiet ok un so`n Mallör!
Endlik büst wedder bi dien Huus,
Klapp up! Oh wat is dat för een Mus!
Alle Saken platt un kört
de Stukeree weer doch verkehrt.
De Wiehnachtsboom hett kiene Spitz,
Omas Stollen hett een groden Ritz.
Kaputt gahn sünd de veel Geschenke,
eenzigst heel de Salv för de Gelenke.
Wat seggt de Werbung in de Dagen,
du bruukst Wiehnachten een grötter Wagen.
Danke, segg ik, för de Rat,
ik fohr jetzt immer mit mien Rad.
Rudi Rabe
24.11.2007 | 
