Maiboom in’t Jeverland – Mood van Öllers her

Ok bi uns in’t Jeverland is dat Upsetten van Maiböm een wennt un overlevert Bruukdom för de Dörpjugend. Hier hannelt sük dat doch um de in’t Volk deep bewuddelt Bliedskupp an dat Weerkomen van’t Vörjahr mit Sünn un Grönt. Dat is bold Pingsten. Overall in’t Land smückt man Hüüs un Wohnungen mit Maigrönt, mit utgrönt Barkentwiegen.

De Schipper smückt ehr Schepen, de Mürker ehr Baugerüst un de Müller sett’t up sin hoog Möhlenflögel een Barkentwieg. Waar dat Barken- un Dannen-Stammen in’t Umstreek gifft, ward mit Erlaubnis van’t Förster een hoog Stamm ut dat Holt in ganz fierlik Tog in’t Dörp haalt, de Asten ofmaakt un mit de grön Spitz an een freei Stee vör’t Gemeenhuus of een Weertskupp in Biwesen van’t Dörpslüü mit Reden un Musik upsett’t. Wenn dat Jungvolk denn noch um’t Maiboom danzt, denn ist dat wat Besünners.

Wenn man kin Barken- of Dannenstamm kreeg, denn setten se’n hoog Stang up, de wurr denn mit Loovbusken, Kranzen of Flaggen smückt. Bi ganz groot Maiboomfiern hebbt büld Burenschaften een Maiboom mitnanner, de denn van de Burenvogt of Weertsmann dat ganz Jahr upböhrt worden is. Dat is een ganz hoog Stang, de mitünner noch dör een Stängenwark vergröttert wurr. Daags vör Pingsten smück man de Stang ok mit Grönt, dat Jungvolk stell hüm up un hull de ganz Nacht Wacht, waarbi se denn ok Alkohol drunken. Nu dürs een anner Burenvolk hüm klauen. Hierbi dürs aber nich een Tau dörsneden worden, wat de Boom hull. Kunn dat Jungvolk, dat dr een Piek up de Boom harr, de Boom klauen, so muss de Burenschaft de nich uppasst harr, de Boom mit’n Tünn Beer utlösen. In’t Jeverland weer ehr dat all weert, een Maiboom to klauen. Mit Danz un Musik wurr he wedder torüggbrocht.

Vör lang Jahren gung dat so to: Een Wagen mit Muuskanten fahr vörut. Achteran twee Wagen, up de de klaut Maiboom leeg, daarna up mehr Wagens de Jungkeerls de de Maiboom klaut harr'n mit ehr Deerns. Peer, Wagens un Minsken sünd riekelk mit Grönt un Blömen smückt. So truck de Tog mit Musik in dat Dörp, waarher de Maiboom stamm. Hier dreihn se een Ehrenkring. De Gasten stegen of un wurr'n, nadeem de Maiboom wedder stunn, mit Eten un Drinken bedehnt. Weertslüü un Gasten danzten een paar Danzen. De mitbrocht Muuskanten spölen up. Denn gung de Tog torügg.

Jüst so geiht dat in uns Tied woll nich mehr to. In’t Jeverland un in’t Harlingerland sungen de Kinner, wenn de Maiboohm upsett’t wurr: ---- Maiboom, Maiboom, holl de Fast, mörgen kummt de frömde Gast. De willt uns de Maiboom nehmen, denn müsst wi uns düchtig schämen.

To Fräulein Marias Tied is dat woll overdadig (ausgelassen) togahn, anners harr se woll in ehr Stadtgerechtigkeit 1572 hier nich an docht. Se hull dat Setten van een „Mayboom“ för een „untüchtig gebruk, darby Megede und Mannsvolk de gantze Nacht waken, drinken, zechen und such andere unbillike Händel drieven. Desulwigen Gewohnheiden schollen hiermed gantz afgdan wesen by teyn Gulden Broke, de Helfte tho der stadt un de andere Helfte tho de Borgermeister Beste“. Zitat Ende.

So een Verbodd hebbt later de Ollnbörger Grafen un ehr Upfolger, de Könige van Dänemark anörnt.

Dat Upsetten van een Maiboom is nich bloß een Handlung in disse Jahrestied. De Bruuk kummt ut ole germanisch-noordsk Weltanschauung. Hierna geiht de Maiboom as ok uns Wiehnachtsboom up de’n Weltenboom, de Weltesche Ygdrasil torügg, de in de Edda, de noordsk Götterlehre, as Levens- un Schicksalsboom ehr besünnern Stellung hett. Se is de gröttst un best van all Böm. Ehr Twiegen gaht över de ganz Welt un ragt över de’n Hemel hoog. (Edda: Leesgood ut dat 13. Jahrhunnert).

Ut Böm sünd na disse Weltanschauung ok de Minsken maakt, ut de Esche „Ask“, ut de Ulme „Embla“. (Ask und Embla, so heet in't noordsk Mythologie de beid eerst Minsken). Dat sünd denn woll de bibelsk „Adam“ un „Eva“. Minsken un Böm hebbt hier een engen Betreck. Mennig Minsken föhlt sük ok sünner Weten verbunnen mit de Boom, de in ehr Leven mitgahn is. So gifft dat in uns vandagig Bruukdom in de Tied van’t Wintersonnenwende as Verwies up dat schedend Lucht de’n Wiehnachtsboom un to de Sommersonnenwende de’n Maiboom.

Dat Setten van een Maiboom as bi uns up’t Land, is in ganz Dütskland un ok Österriek een old Bruukdom. Dat Upsetten van een Maiboom hört tominnst to de düdelk Wör van uns heimatlik Volksbruukdom.

Karin Steiner

10.04.2012