Hilligavend 1945

„Fröhliche Wiehnachten“ heet dat, wenn wi ut de Kark an`n Hilligavend kaamt.

Ik glööv wenn man fraagt wurr: „Waar is dien Heimat?“, mugg ik woll seggen: „Daar wo ik as Kind Wiehnachten fiert heff.“

Wiehnachten is dat Fest van`t Lucht. Fröher bi de Germanen is in de Tied Sünnenwend fiert wurden. As Kaarkfest sall de Kaiser Aurelen de 25. Dezember 274, so leest man dat in Internet, as Festdag inföhrt. „Als reichsweiten Festtag für (Sol Invietus) festgelegt; zwischen diesem Sonnengott und Christus der wahren Sonn, (Christus werus Sol).

De erste Urkunde över dat Christfest stammt van 336 ut Rom.

De Dannenboom gifft dat al vör 500 Johr. Woll al 1539 hett vör de Straßburger Münster een Dannenboom stahn. In 16. Johrhunnert weer dat al Sitte, in Elsaß de Dannenbööm mit Sötigkeiten in ehr Hüser uptostelln. Ok Friedrich de Grode harr al een Wiehnachtsboom. Bi uns is dat so vör 200 Johr allmählich Sitte worden.

As 1945 de erste Hilligavend na’n Krieg weer, harrn de Lüüd wenig to eeten, geev ja Levensmittelkorten, aver een Wiehnachtboom hebbt fast alle hatt. Weer dat erste Wiehnachten in Freden. As wi bi uns de Karsen ansteekt harrn, geev dat eene Stromsperre, harrn doch de Englänners de Strom up’n Hilligavend afschalt. Wi hebbt alle Wiehnachtsleder sungen. De Dannenboom lücht mit de Karsen, in`n Kachelovend wurr de Döör upmaakt. As wi „Stille Nacht“ sungen hebbt, gung dat Lucht wedder an, daar hebbt wi dat wedder utschalt. Faken, so denk ik, süchse Stromsperren weern ok hüüt nich verkehrt an Hilligavend.

In de Wiehnachtsgeschicht „De Frohe Botschaft“ heet dat: „Un bold schweven üm jo een groden Schwarm Engels van Himmel, de loven Gott un sungen: „Ehr wees Gott in de Höcht un Freden up de Eerd, vör al de Minschen, de daar leevt un goodmödig sünd.“ Freden up de Welt kann aver bloot bestahn, wenn Minschen ok vergeven köönt.  Wiehnachten is vör allen Freud, Hoopnung un Freden.

Daarto mien Plattdütsch Leed:

      Laat uns nu singen Melodie Tochter Zion

1.   Laat uns nu singen, dat dat wied hen schallt,
Wiehnacht is Freude, bi uns överall.
Christus is geboren, nu is Wiehnachtstied.
Keeneen is verloren, maakt dat Hart ganz wied.
Laat uns nu singen, dat dat wied hen schallt,
Wiehnacht is Freude, bi uns överall.

2. Laat uns nu singen, dat dat wied hen schallt,
Wiehnacht is Hoopnung, bi uns överall.
Minschen köönt dat maken, up de Zukunft boun,
Dören staht nu open, geevt uns mehr Vertroun.
Laat uns nu singen, dat dat wied hen schallt,
Wiehnacht is Hoopnung, bi uns överall

     3. Laat uns nu singen, dat dat wied hen schallt,
     Wiehnacht brengt Freden, bi uns överall.
     Minschen mööt vergeven, dat alleen bloot tellt,
     so gifft dat Freden in de ganze Welt.
     Laat uns nu singen, dat dat wied hen schallt,
     Wiehnacht is Freden bi uns överall.

C. Fr. Bautsch

11.12.2014