De Katt mit Rad

Een Katt leeg slaperg up ehr Matt.
Ehr Buuk weer full. Se weer so satt.
Do reep de Kater: „Pussikatt,
fahrst du mit mi na d` Stadt mit Rad?“

Do see de Katt: „Ik fleut di wat,
ik gah gliek eerst in `t Hallenbad
un denn snapp ik mien Mountain-Rad
un fahr alleen mit Rad na d` Stadt.“

Na `t Baden steeg de Katt up `t Rad.
Dat regen un dat Padd wurr glatt.
Do fullt de Katt un brook sük wat
un humpel nu mit Rad na d` Stadt.

De Lü, de wunnern sük: „ Wat `s dat?
Hier weer noch nie een Katt mit Rad.“
De Polizei weer ok ganz platt
un broch na `t Krankenhuus de Katt.

In Gips legg man dat Been van d` Katt.
Fief Daag leeg se in d` Stadt up d` Matt.
Se reep an: „Hier is Pussikat.
Ik ligg in `t Krankenhuus in d` Stadt.“

De Kater froog, he weer ganz platt:
Du liggst in `t Krankenhuus in d` Stadt?
Ik kaam glieks mit mien Motorrad
un hol di, segg, gefallt di dat?“

Do see de Katt: “Wat freut mi dat,
Wat maakt wi aver mit mien Rad?“
Du musst di eerst verhalen, Katt!
Un is dien Been weer heel un glatt,

fahrt wi mit Motorrad na d` Stadt
und holt na ´t Inkoopen dien Rad.“
De Kater froog: „Mien Pussikatt.
lettst du mi denn mit di up d` Matt?“

Do see de Katt, ehr Ogen weern natt
Ik hebb di leev, mien Katerkatt!“
Un anner Dag stund denn in `t Blatt,
de beiden de harrn Verlobung hatt.

Se maakden Urlaub nu in `t Watt
un leegen blied un satt up d` Matt.
Dat weer de Story van een Katt:
Fief Jungen weern dat Resultat.

De Kater see:“Wat scheert mi dat!“
He harr al lang een anner Katt.
„Un de Moral“, seggt Pussikatt:
„Wenn `t glatt is, denn fahr nich mit Rad!“

Annegret Neunaber, 26127 Oldenburg
18.04.2017