Flegelbeer is Mannlüüsaak

Oh, dat deit good! Een Dag achter de Internationale Froolüüdag sünd wi bi ‘t Flegelbeer in Middoge tosamen. De Mannslüüchor ut Waddewarden hett inladen. Kannst d‘ ja nich mehr anhören. De hele Dag over Froolüü. In ‘t Bladd, in ´t Radio, in d´ Flimmerkist. Wu slau se sünd, wu good dat word, wenn se de hele Macht kriegt, wu hard wi Mannlüü hör över völe dusend Jahr daalknooit hebbt. Flegelbeerfest, dat is en Ruum ohn Froolüü. Mannslüü unner sük. Tied um to verhalen. Över tweehunnert Mannslüü sünd tosamenkomen. All ut de Männerchöre van ´t Wangerland und umto. Ok en Chor van de anner Sied van d´ Grenz, ut Wittmund, dröfft mitmaken. Sülvst Esensers hebbt sük ünner de Mantel va de ut C’linensiel insleken.

All mitnanner singt se „Grüß Gott mit hellem Klang...“. Man so hell is de Klang nich mehr. As ik mi ümseh, daar sünd dat haast all oll Lüü - as ik. De helle Klang van de Stimmen is woll Vergangenheid. De Flegel-Baas sleit mit en Knüppel an en Beerfatt: „Drinken laten.“ Ja, wenn du denn wat hest! De Mannlüü, de dat Bier brengt (ut Jever, versteiht sük), de sünd so ‘n beten in Stress. Daar fehlen woll de Frolüü, de bi anner Festen in dissen mojen Saal, de oll Pastoree, toseegt, dat all wat kriegen. We seten en ganze Tied ohn Bier daar. Man good, dat wi Sluck hebbt! De Flegel-Baas vertellt van de Historie. Dat in fröher Tieden dat Koorn in d´ Winter mit de Döskflegels dösken word und, wenn ´t Wark doon weer, de Knechten dat mit dat „Flegelbeer“- Fest fiert hebbt. Dat domaals ok de Maid´n up d‘ Hoff daarbi weren, dat seggt he nich.

De Chöre geevt nananner hör Leder to ‘n besten. De eerste, al in en Oller so üm tachentig Jahr, singt, so good as he de Swung noch d‘rup hett: „Wi sünd jung...jung...jung..und voller Swung“. Lacht daar en van mien Mitsängers tegen mi? Wat gifft ‘t daar to lachen? Is doch good, wenn so olle Keerls sük noch jung föhlt. Anners as de een, de jüüst bi dit Leed sük mit en Rollator dörschufft. He mutt woll ganz nödig sien Beer wegbrengen.

Man watt is dat denn? De nächste Chor sleept en Froominsk mit up d‘ Bühn. Und de gifft ok noch de Takt an. Is ja ganz good, wat daar rutkummt. Aver en Froo bi dit Fest? Ik kiek up dat grote Schild an de Wand van d´ Saal: „Flegelbeer is Mannlüüsaak“. Köönt wi nich an een Stee up disse Eer ohn dat anner Geschlecht wesen? Een van de nächste Chöre brengt en Froo mit Akkordeon mit up d‘ Bühn. Daar slickt sük wat in. Schall dat Flegelbeerfest keen Mannlüüsaak mehr wesen? Naast ok noch Frooluü an de sülvig Disk as wi? Mit ´n Beerglas in d´ Hand? Kopp in d´ Nack för en Sööpke (man nich dat helle, dat rode, dat haut se nich so üm). Un denn geiht dat ok seker nich, dat de Flegel-Baas so richtige lüstige Döntjes, alleen för de Ohren van uns Mannlüü, vertellt. Dat hebbt de seker nich so geern. Daar geiht en ganze Kultur fleuten. As ‘t to Enn is, wi Mannlüü hebbt denn doch ördentlik Beer kregen, denn fahren buten de Autos för. „Taxi“ na Huus, Moder an´t Stüür. Daarför is se good.

Anneus Buismann ut Esens

18.03.2019