De Swiensblaas
|
De Swiensblaas
Ja, dat weern anner Tieden as vandaag,“ vertell mien Vader faken wahre Geschichten ut sien Kinner- un Jungvolktied. As he noch een Schooljung weer, gung dat all noch streng to. De Schoolmester harr dat ok faken stuur mit de Jungs. Vader wohn ja in een Fiskerdörp. De Umgangston weer „rauh aber herzlich.“ Un nu de Geschicht van de Swiensblaas.
Harm harr up de Schoolweg sien Nahbers Deern Mimi argert. Se harr so sauber de Huusupgaven vör de Naturlehre maakt, man Harm harr dat allns up hör Schiefertafel eenfach wegwischt. Mimi gung blarrend na`d School un vertell dat hör Mester. Harm harr nu een Laag Hau verdeent, man bloot de oll Mester troe sük dat nich to. Nu schull de Jungmester dat annern Dag doon.
Harm vertell in Huus sien Vader de Geschicht, un de stund hüm bi. De Vader, n` Seemann un Fisker, harr all n` Idee, wu se den Schoolmester een düchtigen Schrick injagen kunnen. Se harrn jüst een Swien schlacht. De Swiensblaas, daar waar ja sonst Roodwurst inmaakt wordt, weer de Rettung. Un nu maakt Harm sien Vader de Blaas halv vull Blood van dat schlacht Swien. |
Annern Dag gung Harm mit de Swiensblaas in de Büxentasch na`d School. De Jungmester röppt hüm na vörn. Harm fingert fix de Blaas achtern in sien Büx. He schall sük bücken. De Mester haut mit een Nötstock to. Blood löppt de Jung sien beid Benen andool. Harm reert luut los un suust ut de Schoolklass. De Schoolmester kriggt`n Schrick un löppt achteran, immer de Bloodspoor na.
De Jung is nich mehr to sehn, aver dat Blood föhrt uns Mester na de Haben, direkt na de Kutter van Harm sien Vader. De harr jüst Middageten fertig. De Mester wull sük entschuldigen, keem aver nich to Woord. De Fisker droh hüm mit een groten Soppenschleef, dat de Mester sük fix umdreihen dee weller in Richtung School. Vader un Harm grienen sük een. Un dat is een wahre Geschicht, denn mien Vader flunker nie.
Werner Götz
01.10.2009