De Linnenboom wurdt doodmaakt

Een Stück Lebensgrundlaag vernelen

Wat kann een grood Mobiltelefonwark mit een ollen Linnenboom gemeensaam hemmen? Ick denk maal, een grood Mobiltelefonwark hätt för `n Bült Minschen een Arbeidsstäe paraat, een Stück Lebensgrundlaag, un een ollen Linnenboom hätt een grood Stück Lebensgrundlaag för ganz veel Insekten un Immen paraat. Dat eersmaal vörwech.

Man hätt intüschen weltwied dör de so nömt Globalisierung een groden Wettbewarv üm de Kunnen un vör allen Dingen üm dat lewe Geld, wormit een suchtvull Riekdomstreben ohn Rücksicht van ganz veel egensüchtig Minschen bedreben word. Dat Bestreben löpt eenfach so: Wu word man un up wat för een Pad flink riek, wer kann een dorto noch verhelpen un well kann man dorför noch anschieten? Schiens is dat weltwied in de Industrielänner een Gesellschkopspeel worden! Nu torügg to dat grood Wark. De Böbersten hebbt good Kunditsionen för `n Tied van fastschreben Johrn uthannelt, üm dat Wark good in d` Lopen to bringen.

Ganz veel Minschen hebbt dor Arbeid un Brood funnen, praktisch eer Lebensgrundlaag un hebbt tröe un good arbeidt. As na de binaah fastschreben Johrn de Ünnergrund bäten maagerer word, hebbt disse Böbersten rutklabüstert, dat man up een anner Stäe  up disse Welt veel mehr Monnies maaken kann, sülvst wenn man een nejed Wark upboen moot. So word ohn Rücksicht up de velen Minschen dat Wark tomaakt. Punkt – ut! Riekdomssucht – Egensucht – Punkt – ut!

Tja – un wat hätt dat nu all mit een ollen groden Linnenboom to don? Ick fang maal so an: Siet Generatsionen van Minschen spendt dissen Boom uns veel Suerstoff, hebbt ganz veel Vögels dor eern Flooghaaben un Konzertplatz un vör allen Dingen hebbt teihndusende oder noch mehr Immen un Insekten in `n Sömmer dor eern Futterplatz, een Stück Lebensgrundlaag. Derten hebbt `n Instinkt dorför, wat good för de egen Lebensgrundlaag is un dorför sünd se ok överut fliedig.

Wi Minschen profiteert dor ok van, wiel wi ja geern Hönnig eten mögt. Üm een Glas Hönnig van een Imm to hemmen, moot se aaber 5 Millionen maal Bloiten anflegen. So hebb `k dat jüst disse Daag in een Fernsehbericht sehn. Se levt immer noch so as in ganz oll Tieden, brukt kien Luxus, bloß eer urold wehnt Freten. Dit Futter, de Lebensgrundlaag för een ganz Tied is dör de Egensucht van Minschen man so verneelt worden, wiel de Blö van so `n Boom as Schiet ankeken word, wat bloß Arbeid bringt un kien Monnies.

Dorto leet de Boom villicht nich genoog Sünnenschien dör. Wu blied mögt wi över jeden Boomschadden noch wen, wenn de Sömmers dör de Klimaaverännerungen so heet werden schölt! Aaber de Boom is in `n poor Stünnen mit Hülp van Kraantechnik un poor Motoorsaagen afsaagt worden – eenfach so. Hebbt de Minschen sick överhaupt Gedanken maakt över dit Geschenk van de Natuur un regeert immer mehr Egensucht puur? Villicht is dat ok de Achtergrund, worüm de Immen schwack worden sünd un sick nich mehr gegen jede Krankheid wehren könt. Dat kun maal een grood Problem werden.

Christa Arntz

22.05.2008