De Hood mutt rünner

De Hood mutt rünner

Dat Foto van Unkel Klaas schull moi bi Tant`Tilly up`t Vertiko stahn. Man mit de oll Hood up`n Kopp wull se em daar nich hendoon. Tant` Tilly harr een Grootunkel (van Moders Siet), de in`ne schlechte Tieden na Amerika utwannert weer. De Familie schnackte fröher völ van dissen Unkel Klaas.

Nu weer Tillys Moder stürven un in de Nachlaat funn se Brefen un Billers van em. Neeschierig keek Tilly sük allns an – man wat gediegen was: He harr jümmers een Hood up`n Kopp. Een van de Billers funn se besünners moi: He stünn as`n staatschen Keerl vör sien groot Huus. He harr dat woll to wat brocht in Amerika. „Dat Bild kummt up mien Vertiko, man de oll Hood mutt van`n Kopp rünner“, dach se sük. Up`n Weg na Huus güng se bi`n Fotograf Backenköhler vörbi und froog: „ Könnt se em woll de Hood afnehmen?“

„Jo, jo“, meen he. „Man wat hett he denn för Haar hat? Hell oder bruun, glatt of Locken?“ Tant Tilly see vergrellt: „Dat weet ik ok nich, ik hebb hüm ja nie sehn! Man, wenn Se em de Hood ofnehmen doot, denn seegt Se dat ja woll sülvens!“

Hilke Lehmann

08. Oktober 2010