Rut ut de Büx
|
|
|
Rut ut de Büx – Landeier up TourGerd schull sien Süster in’t Sauerland bringen. Se wull sück verhalen un een Kur maken. Wiel Gerd sien Froo hör Leevsten nich alleen 750 km an een Dag fahren schull, hett se een Dag Urlaub nomen. Un so fahren de dree fröh mörgens los. Un wiel dat bi olle Minschen so is, seggt Gila, wat Gerd’s Süster is, na een Stünnen: „Gerd, fohr man de nächste Parkplatz an, ik mutt rut ut de Büx.“
Nu kann man dat ja up de Schillers lesen, of up de Parkplatz een WC is. Nee, daar weer nix. Aver denn keem de Hinwies: Nächste Raststätte 5 km. Gerd stür de Parkplatz bi de Raststee an. Lisa gung mit Gila, wiel se de Raststee kennen de. Aver se weer al een paar Jahr nich mehr daar wesen. Up’t Hinwiesschild stunn: Sanifair. Daar kunnen se beide nix mit anfangen. Se keken de Trappen rünner, aver daar weern bloots Schranken. „Laat uns up de anner Siet gahn, daar kenn ik mi ut,“ seggt Lisa. Aver gediegen weer dat woll, dat de Toiletten bloots an een Siet van de Autobahn weern.
De beiden gungen dör dat Restaurant, dat över de Autobahn weer. Trapp rünner, un üm de Eck, ok Barrieren. Oh Mann, dat weer up anner Sied doch woll richtig. Nu mussen de beiden eerst 50 Cents in een Automat smieten, daarmit se wieder kunnen. Gila geev een Euro, denn de Automat kunn wesseln. De Automat spee een Bon rut un Lisa gung dör de Schrank. Wesselgeld keem aver nich torügg. De beiden keken sück an un wussen nich wieder. „Oje, ik moot doch ut de Büx, de Tee will rut.“ Gila trappte van een Been up anner. „Ik kiek mal üm de Eck, of hier well is de helpen kann,“ seeg Lisa.
Se dreihde sück noch maal üm un as de Düwel dat will, seeg se an de linker Sied een Wertbon ut de Automat hangen. Gila probeer, of se up de Sied dör de Schranke keem un schwupps, de Balken röögt sück un Gila leep, so gau as se man kunn, na de Toiletten. Of de Automat woll een Kamera harr un denn erkennen kunn, wenn twee Lü daar stunnen un he mit een Euro füttert wordt, dat denn ok glieks een rechts un een links dör de Schranken lopen kunn?
Aver dat keem noch beter. Na de WC-Benutzung wull Lisa nu de Spölung in Gang setten. Se drückde up een Knoop, doch van Water keen Spoor. Nee, daar keem een lüttje Kasten ut de Mür un de Klobrill dreihde sück in de Runn. Se wull doch bloots spölen, tweemaal probeer se dat noch, aver Water keem nich. Up een Maal seeg se noch een Knoop in de Mür, daar drückde se ok noch up un nu, oh Wunner, leep dat Water to`n Spölen in de Schödel un de Brill dreihde sück noch maal.
„Dat is ja woll een ördentlik Kraam,“ reep Lisa faszeneert. Aver een Verbeterungsvörslag harrn de Beiden antomarken, denn för Landeier weer dat doch beter, up`n Parkplatz glieks Gebruksanwiesungen för den Benutzung van „Sanifair“ to verdelen, anners kann dat ok woll maal in de Büx gahn. Övrigens: As Lisa un Gerd fiev Weken later de Tour noch maal makten, hebbt se extra daar noch maal anhollen un Lisa hett Fotos maakt. Se hett dat noch maal utprobeert mit een Euro, aver nu weer de Automat woll nich programmeert un he spee ganz richtig de Bon un 50 Cents rut.
Erika Bohlen 08.12.2008 |
|
