Allens van Minskenhand

„Du, Mama, de Dom van ……“

Nu geiht de Fraageree wedder los!

„Ja, min Deern, de Dom is een Bischofskark, in de de Pastoren van Anfang an so as de Mönken een Leven mitnanner föhrt hebbt, daarum seggt man ok faken Münster. Dat wichtigst baulich Kennteken is buter de meest faak staatsken Poorten de Chor as Sitz van de Domherren bi’n Gottsdeenst.“

„Well hett de Doms upbaut, Mama?“

“Allens van Minskenhand, min Deern!”

„Mama, Duuu, noch wat! Un een Dampschipp?“

„Ja, een Schnelldamper, daar is vör lang Jahren min Onkel mit na Amerika utwannert. Dat weer so’n ganz groot, modern Schipp för de’n Fahrgastverkehr tüsken de Kontinenten. To dat gröttst Schipp hör ok de „Queen Elizabeth II“. Min Onkel is domaals mit de „Amerika“ na Amerika utwannert.

„Mama, wu kann een so groot un swaar Schipp swemmen? Dat mutt doch egentlik unnergahn. Wenn ik to’n Bispill bi’t Spölen een dicken Flint up’t Water legg, denn blubbert de gliek ünner.“

„Ja, as ik Di eben all vertellt hebb, dat is allens van Minskenhand ….“

„Ach so, Mama, verklaren kannst Du mi dat woll nich so recht. Aber, Du kannst mi seker vertelln, waarum daar in’n Harz bi Oker een Talsperre of Stauwark is!“

„Ik will’t versöken: Quer över een Waterloop van de ganz Talbreddt ward dat Water upstaut, denn löppt dat immer kuntrolleert in’t Leeg wenn man de Talsperre open maakt. Talsperren deent ok as Drinkwaterversörgung, för dat Bewatern för de Schippfahrt, de Leegwater-Upbeterung, de’n Hochwaterschutz un för’t elektrisch Energie. Talsperren ward baut as Staudämme un Staumüren.“

„Minsk, Mama! Well hett dat all utfunnen?“

„Ja, min Deern, dat kummt allens dör Minskenhand!“

„Mama, Du seggst eengaal anto, dat kummt allens van Minskenhand! Mama, kannst Du mi denn vertelln, waar wi Minsken herkomt mit uns Minskenhannen?“

„Ja, min Deern, dat is denn woll so: Ik, na ja, ik, wu sall ik Di dat verklüngeln? Dat kann nich van Minskenhand komen. Dat sall woll so wesen, glöv ik to weten, dat kummt van …..“

„Mama, laht man, ik fraag min Kumpels – un denn vertell ik Di dat klipp un klaar un ganz genau! – Minskenhand?!“

Karin Steiner

30.06.2009