Jazz & Platt

Jazz & Platt         

(Die Schreibweise des Autors wurde unverändert übernommen)

Dor kunn een woll menen, wo passt Jazz un Platt woll tosamen? Ja, dat will ick jo nu verklor`n.

To`n eersten meen ick mit Jazz natürelk de ewig muntere Dixieland-Jazz, van de ick een groot Fan bün. Dat is een Musik, de Melodie un Rhytmus, aber ok Hart un Seel hett. Man kann seggen, een „Good-Luun-Musik.“ To`n annern bruukt wi gor nich wiet weg gahn, üm dissen Jazz antodrepen. Wi hebbt hüm glieks vör de Dör in Jever. Dor gifft dat nemelk een Jazzband, de hör Naam van de Marienstadt afleit hett, blot in engelsk. Kiek, un nu sünd wi ok al bi`t Platt.

Jochen, wat de Baas van de Jazzband is, hett maal anfungen, Texte van bestimmte Jazzklassiker tegen neje, meest lüstige Texten up Platt uttotuschen. To`n Bispill de Text van de „Wabash Blues“, de se mol to Ehr`n van een Stroom in Amerika komponeert hebbt. Dor hett Jochen denn een muie Geschicht van maakt, nemelk van sick un sien Brör. De beiden harrn een Oog up een schmucke Deern smeten. Jochen lacht de Lüttje an un fung an, mit eer to pousseer`n. Bit Jochen denn faststellen muss, dat dat Anlachen van de Deern nich hüm gellen dee, nee, sien Brör weer meent. Ja, so kann dat komen, un dorum hett Jochen ünner annern ok textet: „Wat för`n Malör, de Deern de meent mien egen Brör!“

Nu is Dixieland-Jazz ja een Musik, de Minschen meest in een Hoogstimmung versetten deit. De Rhytmus geiht in d`Blood un de Lüd wippen mit Hannen un Föten in d`Takt. Un de Muuskanten kannst dat in`t Gesicht aflesen, wovöl Spaaß se an hör Musik hebbt. Wenn dat Ganze denn ok noch een Veranstaltung in een Beertuun is un tüschen de Musik noch Döntjes van een Plattsnacker vertellt worden, denn hebbt se all ok noch ördentlik watt to lachen.

Kiek, un dat is, wat ik meen: Wenn de Minschen so een groot Pläseer an so een Veranstaltung hebbt, is dat doch de beste Bewies daarför, dat Jazz un Platt good tosomenpassen.

Hans-Jörg Beyer

03.04.2011