Wat Leevde is

 

Wat Leevde is

 

Heini un ik kennt uns good dartig Jahr – ut de wilde Tied bi`t Studeern. Bi`n Koppke Tee kemen wi tomaal up dat Thema „Leevde.“

 

Wi hebbt beid Sülverhochtied al achter uns – he mit sien Aenna, ik mit mien leev Mann. Heini see: „Ik wüss faken nich, wat ik sünner Aenna doon schull.“ Ik see: „Fritz hett so`n grood Hart as nümms anners.“

 

Heini was an`t siniern: „Wenn een van de Kinner krank weer, hett se de heel  Nacht an`t Bett seten un ik Döskopp hebb schlapen.“ Nu keem ik: „Fritz fohrt ok nachts üm twalv för mi na de Tankstee, wenn ik tomaal so`n Schmacht up Lakritzdüwels hebb.“

 

Heini schmüster un meen: „Ok wenn ik wat to`n fievten Maal vertellen do, seggt se: „Dat ischha intressant!“ Nu ik neeschierig, wat he tegensetten de – ik see: „Fritz hett elk Mörgen Koffie klaar, wenn ik upstah.“ Heini was baff un see: „Wat, ok na 25 Jahren noch!?“ „Mensch Heini“, see ik, „do doch nich so! Ik weet van Aenna sülvst, dat du ehr elk Mörgen Tee an`t Bett brengst!“ He griente, un ik kunn sehn wat he doch: „Dat Froolü sik ok allens vertellen moot.“

 

Ik harr noch wat: „Wenn`t Steen un Been fröst, krabbt Fritz mien Auto mörgens free.“ Daar wull Heini nich nastahn: „Un Aenna kann ut twee Scheibletten un`n halv Paprika `n Dree-Gang-Menü för uns Twee koken.“ Ik glöv, wenn`t Telefon nich pingelt harr, weer dat noch sünnenlang so wiedergahn.

 

Dat weer Aenna. Se fraag: „Is Heino bi di?! Ik bün vandaag nich to`n Inkopen komen. Daar sünd bloot noch twee Scheibletten un`n halv Paprika in Köhlschapp. Kannst`d Heini woll seggen, he schall noch eben fell wat inkopen?“

 

Hilke Lehmann

07.06.2011