De Minsk
|
De Minsk
In`t School schrievt de Schölers een Upsatz över de Minsken. Heini schrifft:
De Minsk is maakt wurden, daar geev dat noch kien Kalenner un Computer, un daarum weet ik nich, wennehr dat weer. De Ururururururgrootvader weer Adam. De Gott hett, wiel Adam immer so alleen un dauernd an blaren weer, Eva ut Lehm maakt un hüm schunken. Un wiel Eva sük nich bewegen dee, hett Adam se een Week mit Water begoten un in de Sünn leggt. Un up eenmaal fung se an sük to bewegen un to babbeln. Daar is Adam weglopen un wull sük versteken in de Gorden „Eden“, aver Eva achteran. Eva hett hüm funnen un mit een Appel anlockt. Adam harr daar aver nich rinbieten musst. Nu weer allens to laat, se mussen nu dat Paradies verlaten. Dat moot nu al lang her wesen hebben, dat steiht al in de Bibel.
Is de Minsk noch lütt, weet man noch nich genau, of he schlau of dösig is. Dat stellt sük eerst herut, wenn he na`d School kummt. Wenn de Schoolmester hüm immer een „Fiev“ of „Sess“ gifft, denn is he dösig. Kriggt he denn Noten van „Een“ of „Twee“ kummt he na`d hoge School. He wurdt denn Politiker of Doktor.
Al wat de Minsk tweemaal hett, is an de Sieden befestigt. Un wat he bloot eenmaal hett, liggt in Midden. Van binnen is he holl, daarmit Eten, Drinken un Luft herin kann. De Minsk hett twee Benen, daarmit he lopen kann un nich dauernd umfallen moot. Ohn Hannen weer de Minsk verloren, he kann denn nich mehr Auto fahren.
De Minsk fallt in twee Delen utnanner, in männlich un weiblich. Eerst siet hunnert Jahren wurden de Froen ok to de Minsken tellt, dat wurr dör een Gesetz regelt.
De Gliekberechtigung för de Froo wordt Würkelkheid. Dat weer ok gültig för de Verkehr. Hier nimmt se de glieker Stellung in.
In uns Huus hett jeder van uns een Bett, bloot Vader moot bi Mama slapen. He kriggt woll nich veel Slaap, annern Dag is he immer so möi. De Minsk wordt up natürelk Wies herstellt. Dat mit de Klapperstörk hebbt sük de Ollen bloot utdacht, üm uns Kinner van Narr to bruken. Aver wi weet Bescheed!! Ik kann dat all in mien Computer nakieken. Un wenn ik dat denn Moder wies, krieg ik een an Piepenkopp. Dat verstah ik nich!!
Daarmit de Minsk an`t Leven blifft, ett he Planten un Flesk. Ok wat to drinken moot he hebben, sonst wurdt dat Bloot to dick. Vader drinkt faken Beer, he fangt denn immer an to singen. Moder schellt denn immer, se sull ok man mehr Beer drinken, immer de Schelleree!!
De Minsk wordt to de Wirbelderten tellt. Dat sücht man daaran, dat he een Skelett mit veel Knaken hett. An de Knaken sünd de Muskels un de Backentenen befestigt. De Apen, de ok to de Minsken tellt, sünd van boven bit unnen vull Haar. Bi uns Vader sünd bloot noch een Paar Haar vör`d Böst övrig bleven. Sien Glatzkopp spaart hüm Geld för`d Friseur, dat kann he nu för sien Smökeree utgeven.
Wenn de Minsk fröh geboren is, is he old. Starven will he nich, wiel he denn nich weet, wat achteran kummt.
Rudi Rabe