Plattdütsch Kark an Olljahrsabend 2007
De Ev. luth. Karkengemeen in Schörtens nögt alltied Enn van`t Jahr to een plattdütsch Andacht. Inleit wordt de festliche Andacht mit een Glockenspeel. In Ofwesselung mit dat grode Glockenlüden wordt tüschendör de Glocken stillstellt
un de Klöppel mit Hand anschlagen. Jung Mannslü hollt dat olle Bruukdom uprecht. To`n Dank gifft dat „Glockenschmeer“, de de Börgermester van de Stadt Schörtens un sien Begleitung övergifft.
Ut dat Binnerste van`d Kark hört de ankomen Besöker de Posauenchor van Schörtens. Posaunenchor un Glockengelüt tosomen geevt een festlich Ümrahmung to den Övergang van`t Olljahr in`t Neeijahr. De Kark is vull besett un de Lü sünd vull Verwachten. Pastor i.R. Hinrich Gerdes hollt wi jeder Jahr de plattdütsch Andacht. De in plattdütsch upsett Karkenleder sünd alltosomen van Paul Gerhardt, de för över 400 Jahren geboren is. De Texte sünd ok vandag nettso modern as dortomal.
Dat erst Leed: (Singwies > Nun lasst uns Gott dem Herren…)
1. Vör Gott willt wi hentreden/ mit Singen un mit Beden.
De Herr hett för uns Lewen/ uns Kraft un Hapen geven.
2. Wi wandert dör uns Lewen/ de Jahr`n, de Gott uns geven.
Dat olle Jahr will gahen/ de Tied, de blifft nich stahen.
3. Gott will uns heel annehmen,/ will in sien Schoot uns heven,
he hett uns leew nich minner,/ as een Vader sien Kinner.
4. De du bewahrtst uns Lewen,/ du kannst uns dat woll geven,
över uns Doon un Laten/ mit dien Ogen to waken.
5. Lob, Herr, för all dien Gaben,/ de nee sünd elk-een Mörgen,
dien Leew kennt doch kien Grenzen,/ kann all uns Hartleed wennen.
6. Herr, du wullt nu dien Segen/ för elk-een Daag uns geven.
Dien Lob willt wi gern singen,/ du wullt dat Heil uns bringen.
7. Dat allens kannst du geven,/ de du doch büst uns Lewen.
Help du dien Kark in Gnaden/ ok dit Jahr, Herr, van baben.
Dat Losungswoord för dat Jahr 2008 is (Johannes 14,19):
Jesus Christus seggt: Ik leew, un ji schöllt ok lewen.
Ünner dit Losungswoord stellt Pastor i.R. Hinrich Gerdes sine Andacht. Aver ok över de Leedermaker Paul Gerhardt stellt he de Verbindung van dortomal to vandag her. In düdelk Spraak lett he noch eenmal de Vörfallen van dat nu to enn` gahn Jahr to Gehör bringen.
De in`t Jahr 1640 baut un 1686 neei maakt Joachim-Kayser-Orgel wordt van de Organist Christian Berner speelt. He un de Posaunenchor Schörtens geevt allens,
üm disse Andacht de festliche Stimmung to geven.
Na een Stünn geiht de Olljahrsabend-Andacht to Enn. Mit een fein Geföhl gaht de Karkenbesöker na Hus un mit de Hopnung, dat dat Jahr 2008 een glückelk un tofree Jahr wordt.
Rudi Rabe
31.12.2007
|
