Herzlich Willkommen!
 |
Bruukdom to Silvester un
|
|
In de Neeijahrsnacht wordt dat olle Johr mit düchdig Radau, Scheteree un Fiereree verofschied`. In de Schörtenser Kark wordt beiert, de Glockenklöppel wordt mit`d Hand bewegt un daarrbi kummt ´ne eegenartig Tonfolge rut. Fröher menen de Lü, dat dör dat lute Gewark de bösen Geister verdreven wurden kunnen. Vandaag is dat Bruukdom, wat hochhollen wurden moot. Fröher rotten sück jung Lü tosomen un makten dumm Tüg. Bi de Nahbers weern up eenmaal Dören un Hecks weg. Bi de Buren stunnen an`d nächsten Dag de Melkbummen midden up`d Mesthopen. Oder de Höhnerstallen stunnen open. All wat nich niet- un nagelfast weer, wordt wegbrocht un versteken.
De Silvesternacht egen sück ok good daarto, een Blick in de Tokunft to smieten. Bleigeten un Kartenleggen is vandaag noch immer to finnen. Vele Glücksbringer hebbt Hochkonjunktur. De veerblödrige Klee schall Glück bringen. Evenso een lütt Swien. Bi de ollen Germanen weer de Eber heilig. He golt as Symbol van de Früchtbaarkeit un daarmit as Teken för Wohlstand un Riekdom. De Schösteenfeger broch dat ganze Jahr dat Glück torügg, wenn de Schösteen dicht weer un he as Retter in`d Not de Lü wedder daarto brocht, dat se wedder koken un heizen kunnen. Dat Symbol för Riekdom is de Glückspennig. Gifft dat egentlik ok een Glückscent? Dat Sünnküken is de Himmelsbote van de Moder Gottes. Dat schall de Kinner schützen un de Kranken helen. Niemals ofschütteln of doodmaken, dat bringt Unglück. Un denn de Avergloven! Bloot kiene Wäsche över`d Neeijahr uphangen, dat bringt Unglück un daarto ok noch veel Arbeid in`d neei Jahr. Oder an`d Neeijahrsdag bloot kien Geflögel eten, denn flüggt dat Glück weg. Daarför beter Linsen- of Bohnensopp, denn geiht dat Lüttgeld dat ganze Jahr nich ut! Dat grode Geld schall nich utgahn, wenn man paar Schuppen van de Neeijahrskarpfen in`d Portmonee deiht. Schall helpen! An`d Neeijahrsdag schall man nich laat upstahn, wiel sonst dat ganze Jahr mit schlecht Schlaap un Drömeree to reken is. Mit verkehrt Been upstahn bidütt nix Good`s. Un`n Hemd verkehrt antrecken bidütt, dat dat ganz Jahr verkehrt löppt. Dat heet: An`d Neeijahrsdag tosomenrieten un nix verkehrt maken, denn kann`t in`d neei Jahr nix passeern. An`n Neeijahrsdag schall man sück ok wat günnen. Meest Tied gifft dat wat feins up`n Disch, Karpfen, Schwienfleeschbraden un Rotkohl un daarto een Glas Wien. Un Namiddags Koffie of Tee mit Krüllkoken un Bamboissis. Un wenn man de Schelleree buten vör`d Dör lett, harmoniert de Familie dat ganz nächst Jahr. Nu noch`n paar flotte Sprök: Is de Silvesternacht düster un klaar, düd dat up een neei un gode Jahr.
Rudi Rabe 27.12.2007 |
|