Herzlich Willkommen!
|
Plattdütsch Kark an Olljahrsabend 2009 So as jeder Jahr nögt de Evangelisk Karkengemeen Schörtens an Olljahrsabend to een plattdütsch Andacht. Een Stünnen vörher fangt dat Klockenlüden an. Dat wordt ünnerbroken dör een Klockenspeel, dat Beiern. Jung Lü koomt tosamen un slaat de Klöppel na een besünner Melodie an de Klock. Dat Klockenlüden un dat Beiern wesselt sük of un daar kummt al van dat Tohören een festlik Stimmung up. Vertreder van de Stadt un van de Heimatvereen Schörtens övergeevt as Dank för de Uprechthollung van dat moie Bruukdom „Klockensmeer.“ De St.-Stephanus-Kark is festlik anstrahlt. Mennigeen blifft stahn un lett de Stimmung in sük upgahn. De Posaunenchor Schörtens stimmt de Besöker al een halv Stünnen vörher up de Andacht in. De Kark is good besett trotz winterlik Weer. Dat eerst Leed: (Singwies >Nun jauchzt dem Herren alle Welt) 1. Freut jo, ji Christen alltomaal,/ lobsingt den Herrn in`Himmelssaal,/ lobsingt un seggt Gott geern jo Dank/ van Harten un jo Leven lang. 2 He hett uns den Herrn Jesus Christ/ herschickt van sienen Thron vörwiss,/ de helpt uns freei van all uns Nood,/ wehrt Satan of un Sünd un Dood. 3. Hör to, du leve Jesus Christ,/ för Hart un Sinn uns Herr du büst,/ vergeten dröff dat nich uns Hart,/ dat du uns Helper immer weerst. 4. Help uns doch ok in`t Neei Jahr,/ wend van uns of Leed un Gefahr,/ ok Krieg un Krankheit, Nood un Dood,/ daarvan help freei, du grode Gott. 5. Laat Segen lopen dör uns Land/ un nimm uns fast, Herr, an dien Hand./ Maak, dat uns Leev de annern kennt,/ holl uns bi Woord un Sakrament. Dat Losungswoord för dat Jahr 2010 is (Johannes 14,1): Jesus Christus seggt: Verjagt jo nich un laat jo Hart nich bang maken. Glövt an Gott un glövt an mi! In sien klaar Stimm hollt Pastor i.R. Hinrich Gerdes sine Andacht. In`t oflopen Jahr hett so mennigeen Freid un Leed beleevt. In sien Torüggkieken tellt he noch maal de Vörfallen van utgahn`t Jahr up. In sien Predigt stellt Pastor Gerdes de Vörfallen van vandaag mit de van de Bibelgeschichten tegenöver. Tüskendör singt de Karkengemeen Leder in plattdütsch Spraak, begleit van de Posaunenchor un de Örgel. Mit dat „Vader unser“ geiht de Olljahrsabend-Andacht to Enn. Pastor Gerdes gifft jeden Besöker bi`d Rutgahn de Hand un wünscht een gesund Neei Jahr. 31.12.2009
|
