Fröhjahrsmöigheid 

Nu is dat wedder sowied, de kollen Daag sünd vörbi, de Natur waakt up van Winterschlaap. „Frühlingserwachen,“ heet dat up Hochdütsch.

Is doch herrlich, wenn allens wedder gröön ward un de linden Lüfte weiht.

Een Saatkoorn liggt up de Eerd. Keen een sücht dat, un denn kummt de Sünn mit ehren warmen Strahl un de Saat kiemt. Langsaam wasst daar een Plant rut un ward gröön. Tulpenzwiebel, de Krokusse un Schneeglöckchen hebbt de ganz Winter in kollen Bodden legen un up eenmal ward dat bunt in alle Farven.

Daar wunnert man sük un staunt. Waar kriggt de Natur bloot all de Farven her ut disse griese, graue Eerd. Waarher de rode, de blaue, de geel un schneewitte Farv. De Wischen un Felder un de Bööm, wat verbruukt de denn för gröne Farv. Daar weer doch vörher bloot graue, griese Eerd, waar se dat ruthaalt. De Veilchen un anner Blöömen kannst van wieden rüken. De Eerd mutt ene richtige Drogerie wesen, ut de man de bunten Farven un Düfte ruthalen  kann.

Bottervögels rüükt dat Kilometer wied. Vögels, de wi in Winter fuddert hebbt, fangt an to singen, waarüm vörher nich? Kraniche, Schwulbkers un Störken koomt ohn „Navigator“ torügg ut feern Länner. Dat is de Tied, wu wi seggt: „Frühlingserwachen.“ Is dat nich ene wunnerschöne Tied? Maakt de Ogen open un jo Haart ganz wied, is wedder de schöne Fröhjahrstied!

Gifft ja aver ok de anner Sied, waar schnackt ward van de „Frühjahrsmüdigkeit.“ Watt heet denn dat nu? Wenn du denn mal in’t Internet kickst, gifft dat daar vele Artikel. De een Professor seggt, dat liggt an de Hormone, de andere meent, de Vitamine sind daar Schuld an. Wedder anner seggt, dat de „Innere Uhr“ sük nich so gau ümstellt. Gifft sogaar Minsken, de meent, ok de Minsk hett so wat as een Winterschlaap, dat bruukt sien Tied. In NDR heff ik sogaar hört, dat över 50 Prozent van de Minsken ünner Fröhjahrsmöigheid lieden doot.

Wat gifft dat bloot vör veel Vörschläg, wat man eten sall un Medikamente, de man daarvör innehmen kann. As Kinner hebbt wi ümmer sungen: „Rut mit jo in de Fröhjahrsluft!“  Dat, glööv ik, helpt noch an besten. Waar aver de Utdruck „Fröhjahrsmöigheid“ herkummt un wat dat genau is, steiht aver nargends in. Ich glööv aver, dat ik een van veel Erklärungen geven kann:

„As fröher noch de meisten Lüüd up Dörp leven deen, weer dat een anner Tied. Van morgens halv sess bit avends halv acht muss arbeiden worden. Wenn denn in Fröhjahr dat Feld plöögt un bestellt worden muss, weer dat besünners hart. Twee Morgen (een halven Hektar) moten an`n Dag plögen. Dat weern 20 Kilometer an Dag achtern Plog lopen, also 12O Kilometer in de Week to Food in de Foor. Dat man denn avends van „Fröhjahrsmöigheid“ snacken kunn, weer klaar. De weern bestimmt möi. Un hüt, een Mitarbeider weer bi sien Arbeid in Büro inslapen, sall maal vörkomen. As nu de Chef rinkummt un em anfaat un upwaakt, seggt de: „Wissen Sie was Sie sind?“ Daar hett de bloot seggt: „Ein aufgeweckter Mitarbeiter.“ Dat weer de richtige Antwoord, dat weer clever, aver dat weer bestimmt kien „Fröhjahrsmöigheid.“

C. Fr. Bautsch

18.04.2013