Herzlich Willkommen!

De rechte Mann

Wer Wahrheid mag, nich ümmer lüggt,

sien Fründ un Kumpel nich bedrüggt,

kenen Lump de Stevel putzt,

nich dat egene Nest beschmutzt.

Wer fast to siene Heimat steiht,

egal waarher de Wind ok weiht,

keene schwore Arbeid scheut,

fiern kann, sik ok mal freut.

Wer free sien Meenung to seggen wagt,

nich ümmer jammert blot un klagt,

de Ogenblick utnutzt un vertroot,

fast up siene Tokunft boot.

Wer öfters ok noch Platt snackt,

allens glieks richtig anpackt,

wenn’t ween mutt, ok mal schwiegen kann,

dat is för uns de rechte Mann!

Carl Friedrich Bautsch

27.02.2012