Herzlich Willkommen!

Vör sesstig Jahren

Sesstig Jahr is dat nu her,

daar hebb ik maal so spekuleert

wat in de Jahren is all passeert.

Wenn ik mi dat so överlegg,

daar weer dat fröher ok nich slecht,

denn wat se hüt eerst lehrt in Kursus,

dat weer för uns tatsächlich usus.

Wu is dat denn mit Kreativität

oder wu dat noor Fremdwoord heet.

Keen een wuss doch wat dat is,

aver dat is doch woll wiss:

Wi kunnen Seep un Sirup koken,

Bössels, Kees un Botter maken.

Kunnen ut Sacktau Faden spinnen,

Kleder weben ut Wull un Linnen,

un ut sülvstanboten Tabak Zigaretten dreihn.

So weer`t domaals!

In Koopmannsladen gliek an uns Padd,

steiht een Suurkohlpott un een Heringsfatt.

An de Mür de holten Schufladen weern to sehn,

un all de Tuten hungen an de Böen.

De Wacht to`n wägen mit de iesern Gewichten

stund up de holten Tresen, daar kunnst denn dat Gewicht ok sichten.

In de Eck daar stund een Petroleum-Fatt un een  Pump to stinken.

Un an de Deck daar hung de Wurst un ok de Schinken.

Dat inkopen weer mehr een plagen,

denn man muss ja allens in Tasken dragen.

Nu nimmst du di een Inkopswagen,

packst hüm vull ut de Regalen.

Un deist du di denn an de Kass verholen

bruukst du denn bloot noch betohlen.

Oh du schöne olle Tied

waar büst du doch so wied – so wied.

Elfriede Oetken

02.07.2009