Brummküsel

     Brummküsel

 

As ik lütt weer, hebbt wi geern mit en Brummküsel speelt. De musst du richtig in Gang bringen un denn dreiht he sik as dull, warrt an’n Enn jümmers sinniger un fallt denn üm. Un wenn wi mehr Kinner weern, denn harr ja de wunnen, de sien Brummküsel sik de längste Tied dreiht hett.

 

Ik heff körtens in de Zeitung lest, dat en Fruu, se weer wull 62 Johr old,  in en Kreisverkehr mehr as fievtig mal ümmer rundrum fohren is. As se ehr fragt hebbt, wat dat schull, hett se seggt, se wull proberen, watt ehr Auto in de Reeg weer. Ik segg di, de hett sik op ehr Kinnertied besunnen un Brummküsel speelt, man blots mit en Auto. Un dat is good gahn, umfullen is se ok nich dorbi.

 

 

Gerd Thiessen

17.08.2013