Fastentied – de “H”-Diät
![]() |
Fastentied – de „H“-Diät Is wedder Fastentied, 40 Dage van Aschermiddeweek an bit Ostern. De Sünndage tellt ja woll nich daarto, denn weern dat ja 44 Daag. Enige willt dat Schmöken upgeven, anner Lü willt ofnehmen. Wenn man old ward un noch good to Weg is, noch lopen kann, ward man faken fraagt: „Wu maakst du dat, dat du noch so fit büst?“ Denn segg ik immer wat mien Spröök is: „Positiv denken, sük sülvst ene Tokunft geven, anner Freud schenken, dat is Balsam vör`t Leven.“ Seker is man nich mehr so gelenkig, man vergett al maal wat, dat is nu maal so in`t Öller. Ik geev denn as Raad, ene „H“-Diät to maken. Allens wat mit “H” schreven ward is good. Mörgens upstahn, eerst een halv Liter Water drinken. To`n Fröhstück denn Haverflocken mit H-Melk, halv Schiev Brood of een Brtötchen mit „Heide-Hönnig.“ Hönnig van uns Imker is gesund. Denn noch een Schiev mit Heidelbeermarmelaad, plattdütsk „Bickbeern.“ Bickbeern hebbt soveel gesunde Stoffe, wu man dat nalesen kann. Wenn man Appetit hett, noch een hard koken Höhnerei. To`n drinken: Hagebutten- of Holundertee. To`n Middag heet dat ja F.D.H. (Friss die Hälfte). Ward man öller, is dat beter van allen bloot halv Portionen to eten. Good schmeckt vörweg heet Hochtiedssopp, Höhnersopp of Heidetuffelssopp. Nich slecht is ok of un an braden halv Hähnchen of Höhnerfrikassee to probeern. As Fleesk is Hackfleskbraden, Hüftsteak of Hirschkalvsbraden to nennen. Bi Fisksorten sünd Heilbutt, Hecht, Hering un de Heideforelle antoraden. Gemüse so as Hülsenfrüchte, Salat hören immer daarto. Achteran Vanillen-Pudding mit Himbeerstipp, lecker. To`n Koffie kann man Hefekoken, Haverflockenmakronen of Haselnööttort to sük nehmen. Bi Avenbroodeten geev dat fröher bi de Buurn mindestens fiev maal in de Week Hering, Hollandske Matjeshering un heet Pelltuffels, de sünd vandag noch gesund. Hollandske Kees un Harzer Kees schmeckt good. To`n schnökern Halvbitter-Schokolaa, sall man good na slapen könen. Good för de Gesundheit sünd Haselnööt. Of un an maal enen Helbing Kümmel, een Hörnerwhiskey (Jägermeister) of een Heidegeist drinken. Dat heet ja: „Wenn man in die Heide reist, drinkt man enen Heidegeist.“ Un nich to vergeten! Vör`d Bedd gahn noch een halv Glas Water drinken! Wenn man sük an disse „H“-Diät holt, kann man old worden. Wichtig is aver ok vör uns Ollen, sien Humor behollen, bi`t Eten nich to överdrieven un immer neeschierig ween!! Carl Friedrich Bautsch
|