Footballtied maakt uns blied!
|
Footballtied maakt uns blied!Annerletzdens hebb ik de Film: „Dat Wunner van Bern“ sehn. De Film hannelt van een lütten Jung ut `t Rheinland, de dat Glück harr, dat Footballendspill in Bern mittobeleven. Dat Tor van sien Fründ Helmut Rahn maak Dütskland 1954 to d´ Footballweltmeister. Dör de Film keem mi weer in d´ Sinn, wo ik de Dag domaals belevt hebb. Dat weer in mien letzt Schooljahr. Ik weer domaals för 8 Week bi mien Schrievfründin Hildegard in ´t Rheinland in Moers-Schwafheim up Visit. Hildegard un hör Öllern haren uns över Pingsten besöcht un mi mit na Huus namen, Wiel dat in d´ Schooltied weer, muss ik dor ok na d´ School hengahn un lehr ´n hüpen Kinner kennen. Un nich blot dat, ne, dor geev dat in d` Kroog all en Fernsehapperat, Wi gungen faken dor hen un köffden uns Brauspulver un drüffen denn en beten kieken. Dat weer för mi wat ganz Besünners, denn bi uns in Huus in Oostfreesland harr noch nüms een Fernsehapperat. In Schwafheim spelen de Jungens ut uns Klass namiddags meestied Football.. Dor geev dat domals all een richdigen Footballplatz. Wi Deerns drüffen tokieken Football weer för mi noch frömd. Wi spelen meestied in d´ School Völkerball. In disse Tied weer nu de Footballweltmeisterschaft. De Mannlü snakden alltied bloot över Football un as faststund, dat Dütskland tegen Ungarn antreden muss un Weltmeister weren kunn, nehm de Begeisterung kien Ennen. Un denn keem de Sönndag van dat Endspill. Wi haren uns mit Kinner ut uns Klass verafredt. Wi wullen mit Bus na Rheinhausen fohren, Dor weer en Zirkus. Dat weer en wunnerbaren Dag. De Sünn schien un dat weer moi warm. In Rheinhausen stund en groot Zirkustelt. Van wieden kunnen wi al de Marschmusik hören un as wi in ´t Telt seten, steeg uns de moi Zirkusröök in d´ Nös. Wi weren gespannt, wat wi to sehn kregen. In so ´n groten Zirkus weer ik noch nie wen. Besünners an de Clowns un Aapen haren wi uns Pleseer, over ok wat de Peer, Elefanten, Löwen un anner Deerten uns wiesen deen, gefullt uns good. Fürslukers, Seildanzers un Akrobaten deen ehr Best. Dat weer en moi Programm. Tüschendör wurr immer bekanntgeven, wo dat Footballspill stund. As de Ungarn dat 1. Tor schoten harrn, wurren de Lü unruhig un fungen an to gnurren. Aver as Dütskland denn ok en Tor harr, wurr vör Begeisterung klatscht. As dat Zirkusprogramm vörbi weer, stund dat 2 to 2. Wi stegen nu weer in d`Bus un fohren na Schwafheim torügg. Ünnerwegens kunnen wi all van wieden sehn, wor een Kroog mit een Fernseher weer, denn dor stunnen de Lü, hauptsächlich Mannlü, vör ´d Dören un´d Fensters. Ok in Schwafheim weer de Kroog vull Lü. Wi haren uns dat Footballspeel ok ja geern ankeken, aver man leet uns nich rin. Nu gungen wi mit een Jung na Huus und settden uns vör ´t Radio hen. As Helmut Rahn denn de 3. Ball för Dütskland in ´t Tor schoten harr un de Reporter „Tor, Tor, Tor“ reep, fullen de Kinner sük vör Bliedskopp üm d´ Hals un blarren vör Freud.. As mien Fründin un ik na Huus gungen, seeg man överall Lü binannerstahn. Se reden all dörnanner un danzden vör Överdat up d´ Straat. Sowat harr ik noch nich beleevt. Ok de Daag nadem wurr över nix anners snakt, as över dat Wunner van Bern. In´t Radio wuren de letzt Minuten van dat Speel immer wedderholt un dat „Tor, Tor, Tor“ van de Reporter kunn ik nich weer vergeten un as ik nu de Film seeg, de tiedwies in ´t Rheinland spelen de, stund mi ´t all weer vör d´Ogen. Un nu is ´t weer spannend:. Dütskland kann Europameister weren!. Un ditmaal kann ik mi all Speelen in ´t Fernsehen ankieken. Toi, toi, toi för uns Footballmannschaft Annegret Neunaber, Oldenburg
|
