Glück mit min Sünn

Glück mit min Sünn

Sünnenupgang un Sünnenunnergang is för mi immer wat ganz Besünners. Wenn man mi tofree laten deith, so as ik dat woll will, denn kann ik all Daag de Sünn knipsen. Eenmaal fahren wi so ganz sinnig mit uns Auto na Huus –un daar mit eenmaal- kreeg ik de Avendsünn to sehn. Ganz groot un dunkelrood stunn se an`t Hemel. Un ik –as faken- kin Knipskasten bi mi. Ik weer ganz dull upgeregt. Ik wull man gau na Huus un min Fotoapparat halen. Aber denkste Puppe, as wi de paar Meter nu fahren weer`n un ik endlik min Fotoapparat in Hannen hull un los wull up dat platte Land, daar weer min Sünn all düchtig deep achter de Hüs an`t Güntsied van`t Straat.

Ik liekers up min Fahrrad un bün in Richtung Sünn fahren. Aber hier toeerst de Hüs, denn een Boom un achteran noch een Bökenheeg. As ik freei Sicht harr, daar weer min Sünn all ganz deep un ok all ganz lüttjet. Ik bün liekers up een Bank an`t Stratenkant klautert –de Autos fahren all an mi vörbi un keken mi an as so`n Weltwunner, um dat ik up disse Bank stunn. Aber ik hebb`n paar Biller knipst. Un wat is daar bit rutkomen? Ünnern up dat Bild bloß swart Eer, links ganz hoog Böm un rechts in Richtung Sünn ganz ünnen een lüttjen rooden Kring up min Bild.

Dat Knipsen bi Sünnenupgang hebb ik bloß eenmaal probeert –in`t Winter bi Sneei un Ies. Maak ik nich wedder. In bün ganz düchtig utglierst in`t Moorland un hebb mi sehr doon. Hier weer ik lievallennig, man good, dat de Knoken heel bleven sünd. Ut Vertwiefeln hebb ik een Negativ ganz groot vergröttern laten un dat so torecht-snippelt, dat ik tominnst een vernünftig Foto daarvan kregen hebb. De Fotografin de weet dat, dat ik so achter min Sünn an bün. Se lacht un meent, dat ik bestimmt noch eenmaal ganz völ Glück hebb. Ik geev dat ok noch nich up!

Mit uns ole Maan hebb ik dat noch nich probeert, dat ward denn so`n Foto „Jever bi Nacht.“

Karin Steiner

22.11.2007