Hamam, dat türkisk Bad

                                                                         Heet Quell in Hierapolis

Hamam, dat türkisk Bad

Eens Daags unner de Tied van uns Türkeiurlaub  leest wi, mien Fründin un ik, dat Angebood in een 5-Steern-Hotel::

„Laat Se sük in uns Hamam verwennen! Bloot 25 EURO, Priesoflaat 5 EURO as Bigaav van dat Reiseunnernehmen.“

Dat hör sük good an! Aver ik harr al sünnerlik Geschichten daaröver hört. „Geihst du daarhen?“ fraag ik mien Fründin, ik troo mi nich!“ Se weer man neeisgierig up dat türkisk Bad wurden un meldt sück an. Na över twee Stünnen keem se torügg un leet sük schlapp in een Sessel plumpsen. „Wat is denn loos? Wu weer dat?“ störm ik mit Fragen up se in. „Ik bruuk eerst eenmal een Sekt,“ weern hör eerst Wör un se vertell:

„Tonächst keem ik in de Saunaberiek. Ik dusch utgiebig mit veel Duschgel un leet mi in de Sauna andaal. Na een kört Tied wordt ik van een good utsehend, dörtrainiert jungen Keerl in Empfang nohmen. Dit weer mien Telektschi, mien  Badwachter. He reich mi een kareert Handdook, nich veel grötter as een Kökenhanddook, wat ik an mien Liev press, üm mien Nakigheid to bedecken.“

„Un wat droog de jung Keerl?“, wull ik weten. „De jung Keerl weer nettsogood halv nakig, bloot mit een haast nett so een Handdook, so wu ik dat kregen harr, dat he eng üm sien Hüft dragen dee. He föhr mi nu in de „hillig Hallen“ van de Hamams, in een mackelk waarm Ruum mit Footboddenheizung, in dump Lucht duukt. De Wannen van dat Kuppelboowark weern mit Floren utkledd. In Marmorbecken in de Nischen sprudel ut twee Hahns kold un upwarmt Water. In de Midd van de Ruum leeg de grote hoch legen heet Steen ut Marmor mit farvig Stenen riek utleggt. Ne, nich so een heet Steen, elektrisch upheizt, up de man een Steak braden kunn! De weer lecker warm un een Pärchen, dat sük bit jüst even daarup rekelt harr, weer tomaal verswunnen.“

„Denn weerst du ja ganz alleen mit hüm in de Ruum!“ smeet ik verbiestert in.

„De Badwachter bredd mien Handdook up de Steen ut, daarup schull ik mi nu leggen. De Zipfel van mien Handdoog schloog he hoch tüsken mien Benen, dat tominnst beten van mien nakend Liev ofdeckt weer. Ik weet nich, of de Klör in mien Gesicht van de heet Sauna herkeem oder mien Backen ut puur Schaam gleuhen deen. För de Badwachter schien dat de normaalst Saak van de Welt to ween. Also, wat sallt`s! Nu weer ik dissen Keerl utlevert, as he mit een sünnerbaar Prozedur anfungen dee. He fung an, mien ganz Liev, all mien Muskels, anfungen van de Tohnen bit to de Fingerspitzen to recken, to drücken un to kneden. As he sük över mi buggt, üm mit de Enkel van sien Duum över mien Rückgrat to strieken, harr ik bloot noch een Gedanken: Hopentlik verschuft sük sien Handdook nich! Un wat he woll darünner droggt?“

Se hull bi`t Vertellen in. „Un wat weer denn?“ froog ik neeisgierig.

„Nu truck he een lütt Sack ut Zegenhaar över sien Hand, rau as een Kattentung, un fung an, mien ganz Liev daarmit to striegeln. Sacht un sinnig weer dat jüst nich! Daarna spöl he mien Huud mit een Schwall van kold Water ut een Bottich of. As ik mi up mien Buuk dreiht harr, wordt mien Rügg nettso bearbeid. Ik föhl mi as een oftrucken Schlang, bloot mien Huud neven mi seeg nich so formmoi ut. Harr ik mi jahrin jahrut nich mehr ördentlik duscht? Schamen sull ik mi!“

Ik weer gespannt, wat nu woll komen dee. „Hexeree! De Badwachter stopp wat in een Koppküssen groot witten Sack un swung hüm dör de Luft. Mitmaal weer he as een upblasen Luftballon drall upfüllt. He schüttel hüm ut un een dick week un wohlrükend Schuum leep över mien Liev. Dat föhl sük good an! Nu streek he noch eenmaal mit sien bloot Hannen över all mien Knaken un spöl mi noch maal mit klaar kold Water of. Mien Huud faat sük nu so sacht un sinnig un so striekelzart an. So as neei geboren föhl ik mi! Torecht behandelt, stunn ik nu vull nakend för mien Masseur, de mi galant in een kuschelweek Handdook inhüllen dee. In een Rohruum muss ik mi eerst maal van dat Abenteuer verholen.“ „Na een kört Tied,“ fohr se wieder, „keem mien Badwachter wedder un knee sük neven mi un wull mi up sien charmant Aard een Gesichtsbehandlung mit all Drum un Dran anbeden. Bloot 25 EURO! Dat weer mi nu doch to veel van`d Goden na dissen upregend Namiddag.

Gedanken verloren keek ik hör to, wu see hör Haar föhnen dee un se akkerat friseer. Se legg een dezent Makeup up. Mit Lidschatten, Wimperntusch, grell leuchtend Lippenstift un fein rükend Parfüm maak se hör Styling. Nu nehm se hör elegant Garderoov ut Schapp un daarto passend Sandaletten mit hoch Hacken. As krönend Ofschluß günn se sük een tweed Glas Sekt, streek noch eenmaal över hör samtweek Huud un föhl sük de ganzen Avend över moi un begehrenswert.

Sull ik mi annern Dag wenigstens för een Gesichtsbehandlung entsluten?

Ilsa Langanke

04.10.2009