In Unmood un Wut kaamt Schimpwöer rut

Of Lü grannig sünd, biester oder laahm in d` Lopen,
annern bedreegt oder willt se för dumm verkopen,
of se dösig sünd, schidderk oder ganz verdrömt,
dorför givt Schimp- oder Unmoodswöer, wu man se nömt. 

Ok in plattdütsch givt de in all Speziaalitäten,

de d` utsnackt, högt sick, wenn dat Woord hätt seten.

Schull dat Seelenstriekeln wen, wenn sowat rutflüggt to d` Snuut,

de Minschen sünd noch kreativ bi d` Schelln in Unmood un Wut.
 

Faaken vörkaamend Naamen word inbunnen in een Schimpwoord

un mit een „oll“ dorvör hört dat noch mehr to de biester Soort.

Ok „Kopp“ un „Mors“ kaamt faaken mit in d` Gefecht,

dor word doch woll veel Bedüdung up leggt.

So kennt oder hört `n:
Jan- Bangbüx, Jan-van-d`- Moor, Hinnerk Stint, iesern Jan-Hinnerk, Jan Gört

oll Dööskopp, oll Dussel, oll Lögenmuul, oll Fluttermors, oll Fuulpuup, oll Zeeg, oll Tödeltant, oll Töffel, oll Traansuus, oll Schleef, oll Freetsack

Dämelhack, Kääskopp, Drömelmors, Schlaapmütz, Törfkopp, Dussel, Piepenkopp, Kröpel,

Luuspudel, Mallaap, Schojert, Schnösel, Schietkopp, Pulterjan, Düvel, Döösbaddel, Wied-

mors, Füerfreter, Halsafschnieder, Tiepelmors, Schuppjack, Kieskopp, Schandaalmaaker,

Groodsnuut, Brilloog, Traanütz, Schwienjack, Queeskopp, Suersnuut,  Schnötermors,

Rödelmors, Sabbelkopp, Tödelmors, Morskruper, Peerkopp, Halvmallen, Schietkeerl,

Muffelpott, Schmeerbuuk, Packvolk, Schwiengood,  Schwienhund, Vergedelmors, Schmacht-

lappen un noch veel mehr, aaber se sünd nu jüst nich in mien Kopp.

Aaber för `n goodmodigen netten Minsch hätt man mit „oll good Blood“ ok een nett Woord

funnen.

Christa Arntz      

20.02.2008