Landpartie up Slött Gödens
![]() |
Landpartie up Slött Gödens |
Georg Graf von Wedel hett vör teihn Jahren een fein Geföhl hatt, up sien Land bi`d Slött Gödens de „Landpartie“ stattfinnen to laten. Van Jahr to Jahr wordt de Besökertahl immer grötter, so weer dat ok in dit Jahr. Wiel de Ofstellplatsen för de Autos un anner Motorfahrtüg begrenzt sünd, wurdt een Shuttlebus van Sande ut insett. Hett wunnerbaar klappt. Daarto keem dit Jahr, dat dat Weer wunnerbaar mitleep. Kien Regen, kien Gewitter so as dat anner Jahren weer. De extra anschafft Landpartie-Regenschirms blievt dit Jahr Lagerhöder. De Sünn schient de ganzen veer Dag, mehr kann man sück nich wünsken.
Dat Slött Gödens hört to de bedüdensten Herrensitzen van ganz Norddütskland. Dat in Barock boot Slött, ümgeven van Water un herrlich legen Parkanlagen, wurdt al sied Generationen van de Familie Graf von Wedel bewohnt un verwahrt. Ok al sied Generationen is de Grafenfamilie mit Land un Lü up innigst verbunnen. Un so sall dat ok so blieven.
De Landpartie verzaubert all Sinne. De Ogen köönt sück nich genoog sattsehn. De Froolü flankiert mit hör moie Kleder, un een Hood is moier as de anner. Un well to Huus noch nich genoog Kleder in`t Schapp hett, de holt sück Anregungen van de Modenschauen. Hier gifft dat Qualität to`n gerechten Pries. Smuck un Uhren sünd heel bült weert. För de Fööt gifft dat fein Schoh. Un för Dit un Dat worden Tasken anboden. Anregungen worden geven bi de Mobiliarofdelen. Accessoires för Buten un Binnen rund dat Angebot of.
De Ohren hört fein Musik, Teehuusmusik. Dat Musiktrio „Die Schwindler“ speelt hör Repertoire in allerbest Wies. Över Cha-Cha-Cha, Swing un Jazz koomt all Stücken bi dat Publikum good an. Dat gifft kien groot Tamtam, allens is sinnig un ohn Hektik. De Besöker wandelt dör de warm Sömmerluft un laat de Seel baumeln. Dat Künstlerdörp büdd Bildhauereen, Malereen un Kunstschmeearbeiden de Uptritt för`d Publikum. De Pagodenzelten fügt sück harmonisch in un lockert so de Atmosphäre up. Na Utkunft van de Utstellungsleitung is de Resonanz good ween. Un dat sall in de nächst Jahren noch wieder utboot wurden.
För`t Liev gifft dat feine Saken to Eten un Drinken. Koffie, Tee un Koken van allerbest Sorten. Un well sück mal wat anners leisten will, de grippt na Wien un Prosecco. Planten un Blömen sünd to bewunnern. Höhepunkt weer de Dööp van de extra för de Landpartie zücht Roos „La Perla.“ De Moder van Georg Graf von Wedel, Heidi Gräfin von Wedel, leet sück dat nich nehmen, de Dööp höchstpersönlek vörtonehmen. De Roos lett champagnerfarvig un is van klassisch Eleganz.
Un doot de Fööt ok sehr van all dat Lopen, dröfft man de Künsthannel un de Bökerladen nich vergeten. Un vör de Gesundheid wurden mennig Saken anboden. Utstellt wurden so veel Saken, dat dat egentlek nich mögelk is, an een Dag allens antokieken un deepgahnde Gespreek to föhren. Fazit: Wünske wurden weckt, de vörher nüms harr. Utstellt un anboden wurden Saken, de dat Leven moi maken. Dat besünners Flair sall man sück günnen, ok wenn dat bloot eenmaal in`t Jahr is. Jedenfalls freut wi uns, dat för`t nächst Jahr wedder de Landpartie ankünnigt is. Willt hopen, dat dat Weer wedder so mitspelen deit.
Rudi Rabe
03.06.2008