Old oder jung mit sesstig?

Old oder jung mit sesstig?

(Die Schreibweise des Autors wurde unverändert übernommen!)

Mien Fründ Andreas hett to sien sesstigsten Gebuursdag inladt. He will ’n beten grötter fiern, denn he nullt ja, un in Rent is he ok all. Man wo is dat eegentlich? Is he nu sesstig Johr old oder jung? Ok wenn dat bi Andreas woll eendütig “jung“ is un de söbentig noch wiet weg schient: Sesstig un een Dag, un een geiht up de söbentig to; dor kannst nix an dreihn. Blot wat is vandaag all söbentig? Fröher, bi uns in Ostfreesland in de 50’er Johrn, ick kann mi noch good erinnern, heet een af söbentig van d’ Oller her all Oma oder Opa. Dat is vandaag mit Utnahmen Gott wes Dank anners. Dat Oller bit fievtig nimmt een ja noch ganz gelassen hen, man af sesstig, sütt dat ’n beten anners ut. Dor föhlt een sick woll noch fit un munter, blot hier un dor de grau oder sülvern Haar is nich to översehn. To ’n ollen Isen hört een dorum aaber noch lang nich.

In disse Tosomenhang fallt mi dor de Gesangstar Udo Jürgens in mit sien Leed “Mit 66 fängt das Leben erst an!“. Un na disse Utsaag het een mit sesstig ja sogor noch  sess Johr Tied, bit dat Leven eerst so richtig losgeiht.

Ok de Filmstar Curd Jürgens hett mol in een Leed sungen: “6o Jahre und kein bisschen weise …“, un wieder  “…auf dem Weg zum Greise, und doch 60 Jahre davon entfernt!“. Kien schlecht Sichtwies, meen ick. Man wenn dat een Dögdikeitsoller för Minschen geven de, sünd dat, wenn d’ hoch kummt, hunnert Johr. Man ick glöv, dor drömt woll de Wenigsten van.

Up so een Gebuursdag falln denn ok so Snacks as „Di kannst dat Oller ok nich ansehn“ oder „Du hest di aber good hollen“. Bi de Mannslüd is dat meest ok kien Problem, över dat Oller to snacken. Een hekel Saak kann dat aaber sien, wenn dat üm Froolüd geiht. Bi de is dat meest sotoseggen een Tabu-Thema. Un wenn dat doch mol dorüm geiht, is Diplomatie anseggt. Man dröfft dat aaber ok nich överdrieven, denn marken se dat nemelk un du büst ünnerdör.

Ick glöv, wi schullen dat all nich so eernst nehmen mit de Snackeree of old oder jung. Jeedeen is so old as he sick föhlt. Seggt wi doch eenfach mit de Woorden van uns jung Lüd: Sesstig is “cool“!

Hans-Jörg Beyer

04.04.2011