Radtour un lecker Eten

Radtour un lecker Eten

Wiel Benzin bold nich mehr to betahlen is, hebbt dree Keerls neelich maal een Radtour maakt. Na een Stünd kemen se bi so`n feinen Waldlokal an. Se setten sük daal un daar keem al een Kellner an un legg de Spieskaart hen.

Minsk, wat stund daar allens up: „Lachs auf Toast, Wachteln auf Spinat, Huhn auf Reis“, un allerhand wat se gaar nich kennen. „Nee“, meen Hein, „so`n Kraam willt wi nich. Wat de Buur nich kennt, dat frett he nich, heet dat ja.“

To`n Ober see he: „Wi willt keen Lachs auf Toast, Wachteln auf Spinat, Huhn auf Reis, wi willt Spegeleier up Schinkenbrod, wi seggt „Strammen Max“ daarto, un een lüttget Beer.“ De Ober noteer dat un broch hör wat se bestellt harrn.

As se nu wiederradeln wulln, repen se de Ober üm to betahlen. He fraagt: „Allens tohoop?“ „Nee“, meen Hein, „jeder vör sük alleen.“ De Ober haal Papier un Kugelschriever ut de Tasch, reekt dat ut un see: „Dat maakt för jeden genau teihn EURO.“ As de Ober dat Geld den Lokalbesitzer geev, meen de: „30 EURO för dat eenfack Eten un lütt Beer is toveel, 25 EURO sünd genoog. Hier hest du 5 EURO, geev de man torügg.“ He geev hüm 5 enkelnd EURO to`n rutgeven.

De Ober överleggt, wi schallst du dat denn utnanner delen. He geev jeden 1 EURO torügg un steek 2 EURO in sien Tasch. Nu harr also jeder Gast 9 EURO betahlt, dat maakt tohoop 27 EURO. 2 EURO harr ja de Ober in sien Tasch steken, dat sünd denn tosomen bloot 29 EURO. 30 EURO aver harrn de dree Lü betahlt. Wo is de een EURO bleven?

Carl Fr. Bautsch

Groß Hesebeck

07.04.2011