Schulden betahlen?

Schulden betahlen?

Een Spreekwoord seggt: „Schulden sünd kene Hasen, de loppt nich eenfach weg.“ 1923 hett dat een Inflation geven. 4,2 Billionen Mark harr daar een Weert van een Dollar. Tahlen, de man nich begrippt. Kuum to glöven, wenn man een Milliarde Schulden hett, daarvan jeden Dag 1000 EURO torüggbetahlen, dürt dat 2739 Jahr, bit de ohn Zinsen wedder betahlt sünd.

Schulden sünd to all Tieden maakt worden. Fröher aver weer dat anners. Wenn man keen Geld harr, leet man anschrieven bi`n Koopmann. Tiedlang leet de sük dat gefallen, denn aver moot man dat betahlen oder man kreeg keen Waar mehr. Kreditkarten eenfach an de Kass dör enen Automaten schuven, dat kenn man nich. Ok bi`n Kröger, wenn man sien Geld vergeten harr, wurr anschreven. Ganz fröher, as vele Lü nich reken un schrieven kunnen, geev dat sogar een „Kerbholt.“ Dat weer een Stock, de in de Mitt upklövt wurr, jedereen kreeg ene Hälft.

In dit Holt schnee de Kröger Knacken, je nadem wat he drunken harr. Wenn he denn all `ne Rieg Knacken daar in harr, heet dat: „De hett ördentlik wat up`n Kerbholt.“ Üm nich immer Reken to schrieven, schicken Veehdoktors, de Schmee oder anner Handwarker bloot eenmal in`t Jahr een Reken. De wurr denn an Lichtmeß betahlt.

Hüt is dat allens anners, wenn du een Reken nich betahlt hest. Eerst kriggst du mündlich een Mahnung, denn een schriftlich Mahnung un denn toletzt een Schrieven van een Rechtsanwalt. Helpt dat all nich, kummt de Exkuter, de Gerichtsvullstrecker. Toletzt denn dat Sozialamt, daarmit du wedder leven kannst. Anners is dat bi de groden Banken, daar könt de Direktoren Schulden maken, de Millionen köst. Doch se kriegt noch Geld daarför, dat se so dumm west sünd.

Sall mal bi een Gastwirt, beter geseggt bi`n Kröger, een rieken Mann komen ween, wiel de Kröger un sien Froo ene gode Peertucht harrn. He legg hüm een 500-EURO-Schien baar up`n Disk, üm sük een Fahlen antokieken, wat he woll kopen wull. De Froo is mit hüm na de Weid henfohren. De Kröger nehm dat Geld, gung na`n Schlachter tegenöver, geev hüm de 500-EURO-Schien, wiel he dat Flesk noch nich betahlt harr. De Schlachter broch de Schien sofort na de Veehhandelsmann, he harr noch 500 EURO Schulden bi hüm. De nu wedder löppt glieks na een Buur und broch hüm dat Geld. He muss noch 500 EURO vör Fudderhaver betahlen. De Buur harr aver jüst Geburdsdag bi`n Kröger fiert un betahl nu glieks de 500 EURO Schulden, de he vör de Geburdsdagsfier noch schuldig weer. Jüst harr de Kröger de Schien in de Hand nomen, daar kummt sien Froo mit de rieken Keerl van de Weids torügg. „Deiht mi leed,“ meen de, „dat Fahlen passt nich in de Farv to mien anner Fahlen.“ De Kröger geev hüm de Schien wedder torügg.

Kiek, so kannst du ok Schulden strieken. De Kröger harr kien Schulden bi`n Schlachter mehr. De wedder weer de Schulden bi`n Veehhandelsmann loos. De Veehhandelsmann weer mitmaal mit de Buur quitt. De Buur hett nu ok sien Geburdsdagsfier betahlt. De rieke Keerl, de de Schien bloot henleggt harr, harr sien Geld ok wedder. So eenfach is dat, Schulden loos to worden.

C. Fr. Bautsch, Gr. Hesebeck

09.04.2011