Us Backhuus

In mien Kinnertied harrn wi in Neenste een Backhuus, dat weer mit Roodstenen muurt. Liekut weer de Backoven. Bi us weer jeedeen Johr, ümmer vör de groten Fierdoog, Backdag. De Lüüd ut de Nahberskop bröchen denn ehr Plotenkoken un Brööd na us her. Use Backoven wöör mit Backholt vörher good warm bött, twee Plotens kemen totied rin. Mit`n Broodschüver wörrn Brööd an beid Sieden henschoven.

Vele Lüüd müssen för den gräsigen tweten Weltkrieg flüchten. Disse Lüüd hebbt den Streuselkoken ehrtieds mitbröcht. Dat weer ganz wat Nee`s för uns. As de Platenkokens so schöön vör usen Backoven stünnen un noch gornich goor weern, hebb ik den Streusel eenfach rünner puult un opeten. Ik hebb nich allens von ene Eck rünner nohmen, nee, so slau weer ik al. Sünst harr ik för disse Grappentöög woll ornlich enen över de Slurn oder mit de Knüttfust wecke an mien Tähnenbacken kregen.

Wokeen fröher bi uns den Bäcker speelt hett, dat weet ik nich mehr. De Nahbers hebbt good tohoop un mitnanner arbeidt un weern övereen, wannehr de Koken üt d` Oven rut müss un gaar weer.

Glieker na`n Krieg geev dat nich veel to köpen, een kunn sik över so ne Wüppensteertskeree ganz düchtig freien. Dat kann uk woll angahn, dat de Koken fröher beter smeckt hett. Dat schall ja ok Minschen geven, för de is de Sucker hüde nich mehr söte genoog. Dat schöne Backhuus steiht dor al lang nich mehr. Wann ik an disse Tied torügg denk, dat weer glieks na`n Krieg, denn löppt mi dat Water in`n Mund tosomen.

Wilhelm Kappelmann, Bassum

23.08.2011