|
Wi sünd Piraten
„Ik
hebb nu en Seilboot ganz för mi alleen“, seggt mien Fründ Jürgen: „en Pirat“.
„Kummst d‘ mit up mien eerste Fahrt?“ „Pirat“ – dat klingt good. So na wiede
Welt, na Abenteuer, na Seefahrers, de dat fuustdick achter d‘ Ohr´n hebben. We
fahren na Bensersiel. Midden tüsken de grote Yachten leeg sien lüttje Boot.
Fiev Meter lang, ohn Kajüüt, mit en Kasten in de Midde för dat Sweert un as
Teken en Indianerbiel boven in ´t grote Seil. „Paas blot nich up mien Sied!“,
reep Jürgen heel vergrellt. „Du musst up d‘ anner Sied dat Gewicht utglieken,
anners geiht dat Boot ünner.“ So harr ik mi dat denn doch nich vörstellt. Man
wi schafft dat, de beid Seils hochtotrecken und seilen rin in de Sünn an en
wunnerbare, man kolle Dag kört vör Pingsten. Dat gung heel gau up Langeoog to. Was doch en flottet Boot.
Stolt, as wenn wi de Eerd umseilt harren, gaht wi
an Land. In de Kneip för de Seilers up de Diek an d´ Haven drinkt wi mit Lüst
en lecker Beer. Denn geiht ´t weer üm. Mit de Flood willt wi gau torügg seilen.
Vör uns gung en „Hanseat“ van d´ Steeg af. So ´n Yacht köst sovööl as en halv
Huus. De Yacht fahrt mit Motor ut d‘ Haven un denn treck se so langsaam de
Seils an d´ Mast hoch. Dat
maakt wat her. „Dat doot wi nu nett so“, so Jürgen. He treckt an de Start-Lien
un will de lüttje Motor anstellen. Veer – fiev Maal, daar springt he an. So
ganz rund löppt he nich. Wi van d‘ Steeg af und nu ran an de Seils un
hochtrucken. Se sünd noch nich boven, daar maakt de Motor noch en paar Maal
tock..tock…tock – un dat weer ‘t. Ganz langsaam drievt wi up de grote sliekig
Stee mit heel wabbelige Schiet, un daar sitten wi denn fast, dartig Meter van
d´ Anlegger för de grote Fährschippen. Un kold was dat! Bannig kolt! Wi haalt
de Seils van d´ Mast un mummeln uns in. So en Sünnendag vör Pingsten, de is
doch jümmer noch bannig kold. Twee, dree Stünnen mussen wi uthollen, denn queem
ganz suutje dat Water torügg. De Seils hochtrucken und af in de Warmt tohuus.
Man wi sünd Piraten, uns kann nix uphollen. Twee
Daag later, ok weer en Dag mit vööl Sünn, geiht dat weer up See. Nu mit en
darde Mann as Hülp … weetst ja nie. Un so seilen wi ganz mooi över d‘
Noordsee tüsken Bensersiel und Langeoog hen un her. Denn geiht dat tüsken de beid grote Steendieks
torügg up de Haven to. Van ‘t hoge Watt achter de Diek winken lüstig de
Touries. Ok wi sünd blied. Daar … en lude Knall. En Want, so ‘n iesdern Wier,
flüggt uns üm de Ohren. Man nich de, de de Mast fastholt. Keen Gefahr. Man
Jürgen is in Panik. He ritt dat Stüürrohr rüm. Dat Boot dreiht sük un mit dree
Mann sitten wi up de verkehrte Sied. Blubb… blubb…blubb.. geiht dat mooi Boot ünner Water, un wi
swemmt üm dat Wark. Wat is de
Noordsee kold! Man ik spöör dat nich. Ik help de annern, dat Boot weer
uptorichten, an d´ Kant van de Fahrrinn is al faste Grund to spören. All de
Saken, de in ´t Boot weren, fisken wi ut ‘t Water rut: Kleedage,
Reddungswesten, holten Breden. Düürt wat, denn hebbt wi allens weer tosamen. En
Boot kweem anbruust. „Wi sünd van DLRG – köönt wi helpen?“ Nee – wi koomt al
alleen torecht. Verklöömt seilen wi mit een Segel an d´ Mast rin in d´ Haven.
Man, wi sünd Piraten, un de hollt nix up. Annern
Dag sünd wi weer up ´t Water. Ok an disse Dag is mooi Weer. Hen und her suust
wi over ’t Water. As wi tüsken de Steendieks weer torügg na d´ Haven seiln,
kummt uns de grote Langeoog-Damper tomööt. Wi tegen hüm sitten all up een Sied
in uns Pirat, de Kraft van d´ Wind so uttoglieken. De Lüü up ´t Schipp, up hör
Fohrt in d´ Ferien, winkt uns blied to. Wi winkt torügg. Daar, up eenmal sünd
wi in d´ Schaa. Dat grote Schipp schufft sük tüsken uns und de Sünn – man ok
tüsken uns und de Wind. Keen Kraft drückt in de Seils un wi mit dree Mann up de
verkehrte Sied. Dat Boot is haast weer an ´t Versupen. Ik mit en Swung de Been
över ‘t Kopp un en Rull rüggels in `t Water. Nützt ja nix. Dat Boot schütt weer
hoch und is reddt. De beid annern in ´t Boot seilt wieder, un ik swemm
achteran. Na en Sett trecken se mi, natt as en Katt, an Boord.
Man dat, wat ik beelevt hebb in disse paar Dagen,
dat hett mi ofhardt. Un: Wat en rechten Pirat is, de lett sük dör nix uphollen.
Anneus Buisman
27.04.2021 |
