Siedensprung in Schaapstall  

De mit insperten Zegenbucken wullen nich bloot kuscheln. Zickenalarm up de Buurenhoff gifft dat, sietdem daar een SCHEEG up de Welt komen is. Klaus Exsternbrink is Buur, de hett Schaap, Zegen un anner Deerten up sien Hoff rümlopen. Doch siet de letzte Week gifft dat nu ok noch eene SCHEEG – so wordt de recht selten Ofkomen van Schaap un Zegen nömt-. 

Bit vör een paar Dag wuss de 59 Jahr olle Buur nich mal, dat de Aard SCHEEG överhaupt up disse Welt geev. He glövt ja ok nich so recht an de unbefleckte Empfängnis. Aver he weer doch so`n beten baff, as he morgens in Schaapstall de lüttje Nawass to sehn kreeg. Ganz fromm keek dat lüttje Deert hüm tomöt, aver sowat harr he denn doch noch ni nich sehn. Nadeem he de Kopp `n beten anstrengt harr, keem he to dat Ergebnis, dat he villicht an disse Saak nich ganz unschüllig weer. Denn vör een paar Maanden harr he de Schaapbucken extra inspeert, daarmit de Schaap nich to fröh in`t Jahr Lammer kregen. Daarmit aver ok de Zegen nich to fröh drachtig wurden, wordt de twee Zegenbucken eenfach bi de Schaapen stellt.

Twee Zegenbucken, meen de Buur, mussen dat woll wesen, denn een Zegenbuck kunn woll mal de Lüst verleren, un wat denn? Nu is dat schienbar so oflopen, dat een van de Ze-genbucken, de denn doch toveel Lüst verspör, sück vör dat „Schaapstünnen“ een van de Schaapfroolü utkeek. Daarut is denn woll de SCHEEG entstahn. Rein optisch sücht dat Deert ja ganz na de Zegenbuck ut, denn dat dunkel un borstig Fell passt ja würgelk nich to so`n kuschelig wull-witt Lamm. 

Doch LISA, so hett Exsternbrink de SCHEEG nömt, is van hör Moder, de feine Schaapsdaam, good annomen wurden, se stött sück nich an dat frömde Utsehn, denn de lecker Melk kummt bi dat Lüttje allerbest an. De anner Schaapsdaamen sünd daar ok mit tofree, dat nu de SCHEEG to de Familie gehört. Doch villicht heet dat upsünners Lamm ja bold ganz anners, denn Buur Exsternbrink hett Kontakt to de Medizinisch Hochschool in Hannover upnomen. Een Gentest schall von Lisa maakt wurden, üm de „Upsünnerstatus“ ok medizinisch to bewiesen.

Disse Luun van de Natur is extrem selten, seggt Professor Karl-Heinz Waldmann ut Hannover. Aver Zegenbucken sünd nu mal för de starken Sexualtriev bekannt. Well daar up well Lüst harr, is ja woll klaar. Of ut Lisas Melk mal Schaaps- oder Zegenkees maakt wordt, moot sück erst wiesen, wenn se sülvst erst mal lammt hett. „Denn willt wi mal sehn, för welker Sied van`t Riechel Lisas Hart schleit,“ seggt Buur Exsternbrink.  

Hanna Luks 

10.02.2008