Wat een Füchten belevte

(Die Schreibweise des Autors wird unverändert übernommen)

Dat wer um 1905. De Gemeende Hatten har 2.228 Inwohner. Disse Tol is bi verwaltungsgeschichte.de/oldenburg funnen worn.Rund umto veel Holt. De jung Füchten, wi nennt se af  nu Alma, freite seck, dat see mit de annern Fuhrenbööm int  Holt an denn Wöschenwech grod warn schull. Eene herlich Tied fung an. Minschen krech Alma un eere Süstern bloots af un an to seen. Meist wer dat de Boomwemser mit sin Jagdjiffel. Een twee Mol int Johr käme he vorbi un starde non Rechten.  Alma un eere Süstern kregen dat mit, wat immer bi de Minschen so secht ward: Foss un Haas gahn hie to Bedd. Dat passte hier akkerat.  Mit de Tid har seck son Holtbodden um de jungen Fuhrenbööm bild. Inn de Augustmonde  weer`n de Bigbeern de Geheemnis von de Froominschen in Hatten un umto. Dor wer dann endlech mol wat los int Holt an Wöschenwech. Ganze Heerscharen von Bigbernsammler kämen vorbi un holten de krüsch Beeren no Hus. De nede Boomwemser passte genau opp, op ok alle eenen Bigbernsammelschin harn. Wenn eene Fro oder ok manchmol een Kirl ohne Schin upfleigen wor, dann let he sine ganze dütsche Machtautorität rut. Vo sine Ogen mossen de, in sine Wohrnehmung, illegolen Bigbernsammler all Behälter woller utkippen un mit de Föt zertrampeln. Alma seh dat natürlich ok, argerte sick doröber, un krech dat een mol hän, dissen arroganten Boomwemser eenen Dannenappel int Gesich to schmieten.

Intwuschen weern foftich Johr int Lann troggen. Vonnen groden Krieg harn de Fuhrenbööm wenich mit krägen. Se harn intwuschen eene Höchte von achtein Meter erreicht. Enige Bööm harn eer kortet Leben all inbüsst. Een Bur boote sinen Heunerwiemn sebentich  Meter vonnen Wöschenwech mitten in de Fuhren. De Towägung un de Platz for denn Heunerwiemn har he rodet.

Alma un eere Süstern gungen nu ok all een beten in de Bredde und erreichten ehr voläufige  Höchde von dartich Meter.

Dat nede Unheil in de Hatter Fuhren wern de Englänner. Se harn sick das Hatter Rebbet in de Fofftiger Johr as Öbungsrebbet for ehre lütschen Panzer ut keken. Een Lieutenant gäve de Order „Builds a roadblock of trees, quickly�. Dat schull häten: �Boot een Stroatsparr, gau“. Furs fungen twee Panzer an, mennig Süsters von Alma um to föhren. No tein Minuten haarn se de Stroatsparr Wöschenwech klor. Foftein Fuhrenbööm mossen for dit militärisch Spektokel ehr Läven lutten. Alma let ganz veel Horz op denn Holtbodden sprenkeln. Se wer ganz bedröbbelt.

Ok disse Tied gung vorbi. Wi sin nu all in de söbentiger Johr. De Hatter Fuhren, speziell in Sandhatten rund um denn Wöschenwech, har de Gemeende tomaal  Wekenennrebbet verdüüsch. Överall worn Grundstücken utmeten un an rieke Utwärtige verkofft. Alma har woller dat Glück, nich direkt dor to stohn, wo bold een Ferijenhus opstellt wor. Tein von ehre Süsters und een por Barken mossen woller dran globen.  Woller let Alma ganz veel Horz op denn Holtbodden sprenkeln.

Dat nede Ferijenhus har een Bremer opstellen loten, een Spreker von Radio Bremen. He käm mit sine Familie elk Wekenenn no Sandhatten um ut to spannen. Alma wor in de Aktivitäten von de Stadtminschen mit introcken. De Spreker broch een Scheetschief bi er an. Von nu an ballerten  de Bremer elk Wekenenn mit een Lüchtpüster op Alma. Se drepen natürlich nich immer de Schief, sunnern Alma ant Horz. Hunnerte Bliekuogels kämen im Lope der Jore so to somen. Alma kunn seck nur weren, indem se manchmol eenen Dannenappel denn Bremer Bagaluten for de Föt schmiet.

Woller twintig Johren loter, dat wer nu all in de negentiger int lesst Johrhunnert, troch Jan un Agnes in dat Ferijenhus, wat nu all een Wohnhaus wer, in.  Jan käm in Brass as he de Bliekuogels bi Alma fund. De tokamen Johren har Alma ehre Ruh. Nums trebelierte se.

Agnes un Jan harn seck am Aanfang  vont nede Johrdusend een Satellitenschöttel opt Dack sett. Dann wer dat Fröhjohr 2014 in Sandhatten ankomen. Alma mogte in ehr Pull een gewaltigen Schöt no alle Siten. „De Füchten dor mutt wech“, seggte de Antennenspezi,“ wie de so breet wornen is, häs kinen Empfang mehr“. Agnes un Jan lösten dat Problem anners. Een Boomroploper  was anhüert. Ruck zuck wer he boben bi Alma un sneed  de Stüünk, wecke innen Wech wirn, eenfach af. Dat Kiekschapp har furs woller sine Funktion. Alma dach för seck:“ Worüm  quält de Minschen us Bööhm nur immer? Wi mokt dat doch ook nich“. Alma weerte seck dat lesde Mol, mit eenen Dannenappel annen Kopp von Jan.

Karl-Heinz Wesemann

15.07.2014