In good Handen avtogeven

In de Nazi Tied was in Plaggenbörg een Lehrer, de was een heel brune un verdreihte Nazi. Besünners tegen de Kark was he an´t lamenteren. De Konfirmanden slieken üm sien Hus rüm up hör Weg toe´t Konfirmandenstünn. Wenn he een toefaten kreeg, denn schull he hüm ut: „Wullt du al weer in de oll Bedschüür?“. Denn geev dat een poor Huusupgaven bobenup.

Sien Moder was een fromme Fro. Hör spiet dat, wu he sük upföhrde. Se harr een old Familienbibel. Man hör Söhn schull de nich arven. Se gung toe de Pastor un frag hüm na de Nam van een van de lüttje Konfirmandenwichters, de dat weert was, disse Bibel as Geschenk toe ehr Konfirmation toe kriegen. (De Bibel is bit vandag in de Egendoom van hör Nokamen.)

Wiel de Lehrer sovöl Lue mit sien Vergrelltheit för de Nazis kujonert harr, willt se em, as de Krieg vörbi was, ut dat Dörp kloppen. He mutt sük verbargen. He truck in een anner Dörp. Paar Johr later kreeg he weer  een Stee as Mester. Een van sien oll Schölers ut Plaggenbörg besöch hüm. He beleev ook sien Unnerricht. Un de was heel good. “Harr he nich bi uns nich nettso weesen kunnt?“

Johren later, de Mester weer al in Ruhstand un leev nu up de anner Siet van´t Ems, dor besöök he hüm weer. De oll Lehrer wies hüm dat Dörp. Se lopen övert Karkhoff. De Lehrer haalt een Slötel ut sien Büx ut makt de Karkendör open. „Ick sünn in disse Dörp de Organist“ see he.

Anneus Buisman
Esens
28.02.2017